ნოდარ ხადური: „სავალუტო ფონდის შეფასება გადაიხედება“

ბიზნესი & ეკონომიკა - 13:37, 13 Oct, 2013

2369

საქართველოს ფინანსთა მინისტრი ნოდარ ხადური იმედოვნებს, რომ მსოფლიო სავალუტო ფონდის შეფასება, რომლის მიხედვითაც ორგანიზაციამ საქართველოს ეკონომიკური ზრდის მაჩვენებელი 2,5%-დე შეამცირა, გადაიხედება.

ამის შესახებ მინისტრმა საერთაშორისო სავალუტო ფონდის აღმასრულებელ დირექტორთან, მენო შნელთან შეხვედრის შემდეგ განაცხადა და დაამატა, რომ ამ პროგნოზით თავად მენო შნელიც გაკვირვებულია:

"საერთაშორისო სავალუტო ფონდის აღმასრულებელ დირექტორთან, მენო შნელთან შეხვედრაზე ვისაუბრეთ საქართველოს ეკონომიკაში არსებულ მდგომარეობაზე, იმ პროგნოზებზე, რომელიც გამოაქვეყნა საერთაშორისო სავალუტო ფონდმა. როგორც გაირკვა, იგი თავადაც გაკვირვებულია ამგვარი პროგნოზით და მივიღეთ პირობა, რომ აღნიშნული შეფასება გადაიხედება", - განაცხადა ხადურმა.მენო შნელის თქმით კი, შეხვედრაზე საუბარი შეეხო საქართველოში ეკონომიკურ აღმავლობასა და განვითარების პერსპექტივებს. "მიმაჩნია, რომ კარგია საქართველოს დელეგაციის ჩამოსვლა წლიურ შეხვედრაზე. ეს საუკეთესო საშუალებაა საერთაშორისო ასპარეზზე შეხვდე პარტნიორებს. დღეს ძალიან ბევრი ვისაუბრეთ ეკონომიკური აღმავლობისა და განვითარების პერსპექტივაზე, მათ შორის საქართველოში. ვფიქრობ, საქართველოს დელეგაციას პოზიტიური შეხვედრები ჰქონდა საერთაშორისო სავალუტო ფონდის ეკონომისტებთან, ასევე, ჰოლანდია-ბელგიის ჯგუფის ხელმძღვანელებთან, რომლებიც ფონდში საქართველოს წარმოადგენენ", - განაცხადა მენო შნელმა.