„თუ თქვენ თვლით, რომ ნოდარ მელაძის გარეშე საქმიანობა არ შეგიძლიათ, გადაწყვეტილება წასვლის თუ დარჩენის შესახებ თავად უნდა მიიღოთ“

„თუ თქვენ თვლით, რომ ნოდარ მელაძის გარეშე საქმიანობა არ შეგიძლიათ, გადაწყვეტილება წასვლის თუ დარჩენის შესახებ თავად უნდა მიიღოთ“ - პაატა სალია ჟურნალისტებს

პოლიტიკა - 16:15, 20 Aug, 2019

940

პაატა სალია აცხადებს, რომ რუსთავი 2-ის ჟურნალისტების საქმიანობაში არავინ ჩაერევა - ამის შესახებ არხის ახალმა გენერალურმა დირექტორმა სპეციალურ ბრიფინგზე განაცხადა. სალიამ ნოდარ მელაძე საინფორმაციო სამსახურის უფროსის თანამდებობიდან გაათავისუფლა, ხოლო ჟურნალისტებს მიმართა, რომ თუ ისინი მელაძის გარეშე ვერ იმუშავებენ, მათი გადასაწყვეტია, დარჩებიან არხზე თუ წავლენ.

„ჩვენ სულ ვსაუბრობთ იმაზე, რომ ვიღაც არის სარედაქციო პოლიტიკის დამოუკიდებლობის გარანტი. ამ არხზე მუშაობს ძალიან ბევრი პროფესიონალი ჟურნალისტი. დიდი იმედი მაქვს, რომ ისინი დარჩებიან და გააგრძელებენ მუშაობას. მათ საქმიანობაში ჩარევას არავინ აპირებს. ამაში თვითონ დარწმუნდებიან.

„რუსთავი 2“-ს და მის ჟურნალისტებს შესწევთ ძალა, რომ გააგრძელონ თავიანთი საქმიანობა ისე, რომ ამაში არავინ ჩაერევა. თუ თქვენ თვლით, რომ ამის გაკეთება ნოდარ მელაძის გარეშე არ შეგიძლიათ, მე ვერაფერს გეტყვით. თქვენი გადაწყვეტილება თქვენ თვითონ უნდა მიიღოთ, თუმცა მე გიდასტურებთ, რომ არ მოხდება თქვენს საქმიანობაში ჩარევა,“ - განაცხადა პაატა სალიამ.