"ვინც ჩემს შვილს ესროლა, დააწინაურეს... ეს სულში ჩაფურთხებაა" - დაკავებული მომიტინგის დედა 20 ივნისის მოვლენებში მონაწილე პოლიციელების დაწინაურებაზე

პოლიტიკა - 09:55, 15 Aug, 2019

1067

20 ივნისს განვითარებული მოვლენებისას ჟურნალისტებზე, პოლიტიკოსებზე და აქციის რიგით მოქალაქეებზე სავარაუდო ძალადობაში მონაწილე პოლიციელების დაწინაურებას დაკავებული მომიტინგეების ოჯახის წევრები ეხმაურებიან. დაკავებული ზურაბ ბუდაღაშვილის დედის მაგული გობეჯიშვილის თქმით, ხელისუფლების ეს ნაბიჯი მისთვის სულში ჩაფურთხებაა:

„იმ ხელისუფლებამ რომელმაც დახვრიტა, რომელმაც დათხარა თვალები, რომელმაც დააპატიმრა ეს ბიჭები არ აქვს უფლება გამოძიება ჩაატაროს. თავად არის დამნაშავე ეს ხელისუფლება და თავად ჩემს შვილს ესროლეს, ორი ტყვია ჰქონდა მოხვედრილი. ის დაჭერილია და მის მსროლელ პოლიციელებს აწინაურებენ. ეს ჩემთვის შეურაცხმყოფელი კი არა, სულში ჩაფურთხებაა,“-განაცხადა ზურაბ ბუდაღაშვილის დედამ, მაგული გობეჯიშვილმა.

შეგახსენებთ, რომ პატრულის მაღალჩინოსანი ალექსანდრე ბირთველიშვილი, რომელიც აქციის მონაწილეებს კიბიდან ყრიდა, ქვემო ქართლის საპატრულო პოლიციის შეფად დაინიშნა. გარდა ამისა, დააწინაურეს 20 ივნისს, მოქალაქეებზე ძალადობის ერთ-ერთი მთავარი შემოქმედი ვაჟა სირაძეც, ის საქართველოს საპატრულო პოლიციის უფროსად დაინიშნა. სირაძე არის ის მაღალჩინოსანი, რომელმაც პარლამენტის წევრი ნიკა მელია შენობიდან გამოაძევა, ასევ კანონის დარღვევით და ძალის გამოყენებით ქუჩაში გამოაძევა საკანონდებლო ორგანოდან "კურიერის" ჟურნალისტი თამარ ბაღაშვილი და ოპერატორი გიორგი კვიწინიძე.