"სატელიტი პარტიები იმ ზღაპრების ნაწილია, რის პროპაგანდასაც ოპონენტების უპასუხისმგებლო ნაწილი აკეთებს" - ვისთან გეგმავს ბახტაძე თანამშრომლობას კოალიციური მთავრობის შექმნისას

პოლიტიკა - 12:44, 13 Aug, 2019

1038

საქართველოს პრემიერ-მინისტრი არ გამორიცხავს, რომ საპარლამენტო არჩევნების შემდეგ კოალიციური მთავრობის ჩამოყალიბების საჭიროება დადგეს. ბახტაძის თქმით, ქართული ოცნება არასდროს ითანამშრომლებს დამნაშავე ძალასთან და ასევე პარტნიორების შერჩევა პროდასავლურობის მიხედვით მოხდება. ბახტაძემ მმართველი გუნდის მიერ სატელიტი პარტიების მოსალოდნელ შექმნაზეც გააკეტა კომენტარი და განაცხადა რომ ეს ოპონენტების სპეკულაციაა:

„ქართული ოცნება“ არასოდეს ითანამშრომლებს დამნაშავე ძალასთან; ჩვენი ერის ცივილიზაციური არჩევანი, რომ საქართველო აუცილებლად უნდა გახდეს ევროკავშირისა და ნატო-ს სრულფასოვანი წევრი, აბსოლუტური პრიორიტეტია. აქედან გამომდინარე, ბუნებრივია, მომავალში ჩვენი თანამშრომლობა შესაძლებელი იქნება მხოლოდ იმ ძალებთან, რომლებიც ამ სულისკვეთებას იზიარებენ.სატელიტი პარტიები არის იმ ზღაპრების ნაწილი, რის პროპაგანდასაც, სამწუხაროდ, ჩვენი ოპონენტების უპასუხისმგებლო ნაწილი აკეთებს. როდესაც ვსაუბრობთ პროპორციულ საარჩევნო სისტემაზე ბუნებრივი, ნულოვანი ბარიერით, რა თქმა უნდა, იმის ალბათობა, რომ კოალიციური მთავრობა შეიძლება იყოს, მნიშვნელოვნად იზრდება და ერთადერთი, ვინც გადაწყვეტილებას მიიღებს, იქნება ქართველი ერი. აქედან გამომდინარე, წინ არ გავუსწროთ მოვლენებს. ერთ წელზე მეტია დარჩენილი არჩევნებამდე და ერთადერთი, ვინც გადაწყვეტილებას მიიღებს, იქნება ქართველი ამომრჩეველი. სხვა ყველაფერი, რასაც ოპოზიციის უპასუხისმგებლო ნაწილისგან ვისმენთ, არის ტყუილი დეზინფორმაცია და იაფფასიანი პოლიტიკური ზღაპრები.“- განაცხადა მამუკა ბახტაძემ.