"მოდაში შემოვიდა, რომ ყველაფერი უკავშირდება ან პოლიტიკას ან ტელევიზიის დაარსების გეგმას"- ვოლსკი კეზერაშვილის წინააღმდეგ დაწყებულ გამოძიებაზე საუბრობს

პოლიტიკა - 19:21, 12 Aug, 2019

1025

საპარლამენტო უმრავლესობის ლიდერმა დღეს კომენტარი დავით კეზერაშვილის წინააღმდეგ გამოძიების დაწყებასთან დაკავშირებით გააკეთა. მისი თქმით, ისრაელის მედიაში ვრცელდება ინფორმაცია, საიდანაც ირკვევა, რომ საქართველოს თავდაცვის ყოფილი მინისტრი კეზერაშვილი იარაღის უკანონო ვაჭრობისა და საერთაშორისო კორუფციული გარიგებების მთავარი ფიგურანტია.

ვოლსკის თქმით, სამართალდამცავი ორგანოების გადასაწყვეტია, იქნება თუ არა კეზერაშვილის საქართველოში ექსტრადირების მოთხოვნა დაყენებული, თუმცა მმართველი გუნდის წევრი უარყოფს იმას, რომ კეზერაშვილის წინაააღმდეგ დაწყებული გამოძიება მის პოლიტიკურ გააქტიურებას და ახალი ტელევიზიის შექმნასთან დაკავშირებით გაკეთებულ განცხადებას უკავშირდება:

"მოდაში შემოვიდა, რომ ყველაფერი უკავშირდება ან პოლიტიკას ან ტელევიზიის დაარსების გეგმას, მაგრამ რეალურად ჩვენ ვხედავთ, რომ დანაშაულის ნიშნები არსებობს და დანაშაულის ნიშნების არსებობაზე გამოძიების არჩატარება ადამიანი გაშინებს ან ინდულგენციას ყიდულობს თავისი პოლიტიკჯური გეგმების განცხადებით. გააკეთებს განცხადებას, რომ პოლიტიკური გეგმები აქვს, ამავე დროს, მეორე მხრივ, შეიძლება სერიოზული დიდი ფინანსური დანაშაულები ჰქონდეს. ასე, რომ ერთი და მეორე ამ ფაქტების დაკავშირება, ბოლო პერიოდში საინფორმაციო ველზე, საკმაოდ ინტენსიურად ხდება." - განაცხადა ვოლსკიმ.

ვოლსკის თქმით, ისრაელში კეზერაშვილის წინააღმდეგ გამოძიება მიმდინარეობს. ამას გარდა, ვოლსკი ამბობს, რომ გამოძიება საქართველოშიც არის დაწყებული.

„ინფორმაცია, რაც საზოგადოებაში გავრცელდა იმის თაობაზე, რომ ისრაელში მიმდინარეობს საკმაოდ სერიოზული, ინტენსიური საგამოძიებო მოქმედებები მისი და კიდევ ერთი ყოფილი მაღალჩინოსნის საქმიანობასთან დაკავშირებით, რაც იარაღით ვაჭრობას ეხება. ეს ისრაელში, რაც მიმდინარეობს, საქართველოში საკმაოდ ბურუსით მოცულ ვითარებაში დატოვა კეზერაშვილმა თავდაცვის მინისტრის პოსტი, იქამდე რამდენადაც ვიცი, დეკლარირებული არ ჰქონდა ქონება, თუმცა, ომის შემდგომ პერიოდში, ოფშორულ ზონაში დარეგისტრირებულ კომპანიაში მილიარდობით ბრუნვა იქნა გამოვლენილი. გარდა ამისა, არის თემები, რომელიც ეხება პროკურატურის მიერ, მე რამდენადაც ვიცი, მიმდინარე გამოძიებას, ერთი არის ფინანსური გადაცდომების საკითხზე და 7 ნოემბრის დარბევის საკითხზე. ასე, რომ ფინანსურ თემასთან დაკავშირებით, ბოროტად გამოყენების, კვალიფიკაცია არ მახსოვს ზუსტად, არის საქართველოშიც მიმდინარე საგამოძიებო პროცესი. წინასწარ მე ვერაფერს ვერ ვიტყვი, ვერც ამ ეტაპზე ვერ შევცვლი გამომძიებლის კომენტარს ამ საქმეზე.“ - განაცხადა ვოლსკიმ.