მამუკა ხაზარაძე სექტემბერში ახალ პოლიტიკურ მოძრაობას ქმნის.

როგორც "ერთიანი ნაციონალური მოძრაობის" წევრი რომან გოცირიძე აღნიშნულთან დაკავშირებით აცხადებს, ხაზარაძეს აქვს ის ძალა, რომ ებრძოლოს ამ ოლიგარქიულ რეჟიმს და თავისი ქვა დადოს ამ სისტემის დემონტაჟში.

„კარგია, რომ ის გააქტიურდა, კრიტიკით არ ვამბობ, თუმცა, სანამ მას არ შეეხნენ, მანამდე სად იყო და ა.შ. ყოველგვარი მსგავსი კბენები არის მეორეხარისხოვანი. მას აქვს ის რესურსი, რომ საკმაო პოლიტიკური მხარდაჭერა მიიღოს და მას აქვს ის ძალა, რომ ებრძოლოს ამ ოლიგარქიულ რეჟიმს და თავისი ქვა დადოს ამ სისტემის დემონტაჟში, მამუკა ხაზარაძის მიერ გაკეთებული განაცხადი, რომ ის ქმნის პოლიტიკურ მოძრაობას, სინამდვილეში ასე უნდა გავიგოთ, ეს არის იმის ნიშანი, რომ უკვე უკიდურეს ზღვრამდე არის მისული ქვეყანაში ვითარება და ბიზნესს უკვე არ შეუძლია სუნთქვა და რაღაც უნდა იღონოს ყველამ ერთად. მან საკუთარ ტყავზე და თავზე იგრძნო რეპრესიული სუსხი, რეპრესიული ზეწოლის სიმძიმე, ფაქტობრივად, პატიმარია, ქვეყნიდან გასვლის უფლებაც კი არ აქვს. ამ მასშტაბის კომპანიების და ამ პროექტების ხელმძღვანელისადმი ასე მოქცევა სიგნალია სხვა ბიზნესისთვის, რომ თუ მას ექცევიან ასე, სხვებს გაჭყლეტენ ჭიაღუასავით" - აღნიშნა გოცირიძემ.