ნიკა მელია იურისტ ანა ნაცვლიშვილის ხმაურიან განცხადებას ეხმაურება.

მელია ამბობს, რომ ამ ყველაფრის გაგების შემდეგ დეპუტატებმა ძალოვანი სტრუქტურის წარმომადგენლებს პასუხი უნდა მოსთხოვონ, მათი შეცდომაში შეყვანის გამო.

„ მათ მაგივრად შემრცხვა, მაშინაც მრცხვენოდა, როდესაც იქ ვიყავი, მათ ნაცვლად იმიტომ, რომ ჩანდა ხელშესახებად, რომ დიდ ნაწილს არ უნდოდა იმის კეთება, რასაც აკეთებდა. ახლა, რაც ანა ნაცვლიშვილმა გაასაჯაროვა, ეს ჩემთვის უფრო ტრაგიკულია, ვიდრე კომიკური, იმიტომ, რომ ეს დეპუტატები ხომ კვლავ დეპუტატები არიან, ძვირფასო დეპუტატებო, ერთი წამით, რომ დაგიჯეროთ, რომ თქვენ შეცდომაში იყავით შეყვანილნი ბიძინა ივანიშვილის მიერ ან გენერალური პროკურორის, თადუმაძის მიერ, ერთნი არიან მაინც, ახლა მაინც, ამ ინფორმაციის მიღების შემდეგ, ხომ უნდა გამოხვიდეთ და პასუხი მოსთხოვოთ, როგორც მინიმუმ, გენერალურ პროკურორს, რომ რა გამიკეთე, რა მდგომარეობაში ჩამაგდე, რატომ მაკადრე. ეს ქვეყანა მართლაც კინოს გადასაღები პავილიონი არ არის და ამ კინოს გადასაღებ პავილიონში თქვენ მსახიობები ხომ არ ხართ, დეპუტატები ხართ და თქვენი სახელი და გვარები ისტორიას დარჩება და მე უფრო გგულშემატკივრობთ, მგონი თქვენ, ვიდრე თქვენ საკუთარ თავებს. ღირსება დაიცავით, თორემ ნიკა მელია რომ არ გაინტერესებთ, გასაგებია“, - ამბობს ნიკა მელია.

ნიკა მელია აცხადებს, რომ მის საქმეზე გადაწყვეტილება პირადად ბიძინა ივანიშვილმა მიიღო.

„ბიძინა ივანიშვილმა ხელი დაურტყა მაგიდაზე წინა დღეს და თქვა, რომ მელია უნდა წავიდეს ციხეში და ამისთვის იმუნიტეტი უნდა მოეხსნას და შემოვიდნენ პროკურორები, დახვდათ 93 დეპუტატი და გააკეთეს ის, რაც გააკეთეს. არავის არაფერი წაუკითხავს,“ - განაცხადა ნიკა მელიამ.

დეპუტატი ამბობს, რომ შეზღუდვების მიუხედავად, ის პარლამენტში საშემოდგომო სესიის დაწყებისას აუცილებლად მივა.

„3 სექტემბერს სახლიდან გამოვალ და მივალ პარლამენტში და დავესწრები საპარლამენტო სხდომას და, ალბათ, იქაც მექნება შესაძლებლობა, გავესაუბრო ჩემს კოლეგებს, რომლებმაც მიიღეს ეს გადაწყვეტილება, თუმცა, ნიშნის მოგებას არავისთვის ვაპირებ“, - განაცხადა ნიკა მელიამ.