"არ მგონია, რომ განსაკუთრებული მსხვერპლი იყოს ნიკა გვარამია რაღაც შეთქმულების"- "ოცნების" წევრები გვარამიასთვის ბრალის წაყენებაში პრობლემას ვერ ხედავენ

პოლიტიკა - 15:40, 09 Aug, 2019

754

ხელისუფლების წარმომადგენლები პროკურატურის მიერ ნიკა გვარამიასთვის ბრალის წაყენებას ეხმაურებიან და ამაში პრობლემას ვერ ხედავენ.

„არ მგონია, რომ განსაკუთრებული მსხვერპლი იყოს ნიკა გვარამია რაღაც შეთქმულების“, - თქვა პარლამენტის ფრაქცია ”ქართული ოცნების” წევრმა, დიმიტრი ცქიტიშვილმა.

„არ მინდა სპეკულაციებში შევიდე და არც ის მგონია, რომ რაღაც განსაკუთრებული ხდება. თუ ადამიანს აქვს დანაშაული, შეიძლება ამაზე პასუხი აგებინოს. პროკურატურა თუ არასწორად იძიებს საქმეს ან არასწორი დასკვნა დადო, ამას სასამართლო დაადგენს. ამიტომ, მე არ მგონია, რომ განსაკუთრებული მსხვერპლი იყოს ნიკა გვარამია რაღაც შეთქმულების. არ მგონია, რომ კონსპირაციასთანგვქონდეს საქმე, მიზანმიმართულ დევნასთან, ეს არის ჩვეულებრივი საგამოძიებო პროცესი. თუ გამოვლინდა დანაშაული, არავინ არ არის დანაშაულის შემთხვევაში დაცული, მათ შორის არც მე“, - ათქვა მან.

„რუსთავი 2-ის“ ყოფილი გენერალური დირექტორისთვის, ნიკა გვარამიასთვის პროკურატურის მიერ ბრალის წაყენებას ეხმაურება დავით მათიკაშვილიც.

მისი თქმით, გვარამია არ უნდა წარმოადგენდეს გამონაკლისს, ვის მიმართაც საგამოძიებო ორგანომ კითხვები არ უნდა დასვას.

„ჩვენს ქვეყანაში შექმნილია ერთგვარი ტრენდი, რომ აუცილებლად პოლიტიკასთან უნდა დააკავშირონ ცალკეულ მოქალაქეებთან, ყოფილ პოლიტიკოსებთან, მაღალჩინოსნებთან, ტელევიზიის ხელმძღვანელებთან, არ აქვს მნიშვნელობა, ჩვეულებრივად რიგით მოქალაქეებთან არსებული კითხვები, რომელიც გამოძიებას გააჩნია. არავინ ჩვენს ქვეყანაში არ უნდა იყოს ინდულგირებული იმით, რომ თუნდაც ის წარმოადგენდა ტელევიზიის ხელმძღვანელს ცოტა ხნის წინ. მიუხედავად ამ ყველაფრისა, ყველამ პასუხი უნდა გასცეს გამოძიების კითხვებს, არ არის ნიკა გვარამია გამონაკლისი. ჩვენი, პარლამენტის ვალი არის გამოძიებაზე დაკვირვება, რომ გამოძიება ჩატარდეს გამჭვირვალედ,“ - განაცხადა მათიკაშვილმა.

ნიკა გვარამიას პროკურატურამ ბრალი დღეს წაუყენა. გვარამიას ბრალი სისხლის სამართლის კოდექსის 220-ე მუხლით წაუყენეს, რაც საწარმოს ხელმძღვანელობითიდა წარმომადგენლობითი უფლებამოსილების გამოყენებას, ამ ორგანიზაციის კანონიერი ინტერესების საწინააღმდეგოდ მოქმედებას გულისხმობს, რამაც მნიშვნელოვანი ზიანი გამოიწვია.

სამაუწყებლო კომპანიის ყოფილი გენერალური დირექტორი, ნიკა გვარამია ბრალდების შესახებ დადგენილების წარდგენის მიზნით დღეს 19:00 საათზე არის პროკურატურაში დაბარებული.

ბრალი 3-დან 5 წლამდე თავისუფლების აღკვეთას ითვალისწინებს.