735 მილიონი ლარი საჯარო მოხელეების პრემიებში, ხელფასებსა და დანამატებში - "საჯარო დაწესებულებები გადაქცეულია პარტიული აქტივის დასაქმების ადგილად"

პოლიტიკა - 11:23, 09 Aug, 2019

879

ოპოზიცია გაზრდილ ბიუროკრატიულ ხარჯებზე საუბრობს. როგორც ირკვევა, საქართველოს მთავრობამ საჯარო მოხელეების პრემიებში, ხელფასებსა და დანამატებში 735 მილიონი ლარი დახარჯა.

ხელისუფლების ოპონენტების შეფასებით, პრემიებით და დანამატებით მმართველი გუნდი პარტიული აქტივის საარჩევნო წახალისებას ახდენს.

„ლარის გაუფასურების ერთ-ერთ მიზეზი არის ბიუჯეტის ხარჯების სტრუქტურის ცვლილება. უზარმაზარი რაოდენობით გაიხარჯა ბიუროკრატიული ხარჯები. ასეთი მზარდი ხარჯები ბიუროკრატიული აპარატისა, არის ერთის მხრივ გაუმართლებელი, რომელიც ლარს აწვება და მეორეს მხრივა არაზნეობრივია, ვინაიდან ამ ადამიანების შენახვა ემსახურება ერთადერთ მიზანს, ნეპოტიზმსა და ამ ხალხის გამოყენებას „ქართული ოცნების“ საარჩევნო შტაბებში. გაჭირვებული ადამიანების ფულით ინახავენ თავიანთ პარტიულ აქტივს,“-აცხადებს რომან გოცირიძე.

„ევროპულ საქართველოში“ თვლიან, რომ საჯარო დაწესებულებები გადაქცეულია პარტიული აქტივის დასაქმების ადგილად.

„მნიშვნელოვანი ფაქტორია, რომ ეკონომიკა არ იზრდება და ეკონომიკა არ იზრდება სწორედ იმის გამო, რომ დიდია სამთავრობო ტვირთი. რაც სტაბილურად მიდის წინ, ეს არის ბიუროკრატიის ხარჯები. ეს არის მთავრობის, სხვადასხვა მუნიციპალიტეტების, თვითმმართველობების ხარჯები. ისედაც პარტიული აქტივის დასაქმების ადგილად აქვთ გადაქცეული საჯარო სამსახურები და არც კმაყოფილდებიან იმ ხელფასით, რომელიც აქვთ და კიდევ უფრო მეტ ტვირთად აწვებიან ჩვენს მოქალაქეებს,“- თქვა თემის კომენტირებისას ოთო კახიძემ.

მაღალი თანამდებობის პირებისთვის ანაზღაურების ზრდას უარყოფენ მმართველ გუნდში.

„მოხდა გარკვეული ტიპის ცვლილებები იმასთან დაკავშირებით, რომ თუკი ხელზე ასაღები თანხა შეადგენდა როგორც სახელფასო განაკვეთს, ასევე სარგოს, მთლიანობაში ფორმირდა ეს როგორც სახელფასო განაკვეთი, შესაბამისად არანაირი მომატება არ ყოფილა საჯარო სექტორში,“-ამბობს პარლამენტის საპროცედურო საკითხთა და წესების კომიტეტის თავმჯდომარის პირველი მოადგილე, გურამ მაჭარაშვილი.