აგვისტოს ომის მეთერთმეტე წლისთავთან დაკავშირებით ამ წუთებში სოფელ ერგნეთში საპროტესტო აქცია მიმდინარეობს. „ნიუპოსტის“ კორესპონდნეტის ცნობით, ანტისაოკუპაციო აქციას სამოქალაქო აქტივისტები მართავენ. ისინი აპროტესტებენ რუსეთის მიერ, საქართველოს ტერიტორიების ოკუპაციას და ხელისუფლებას ქმედითი ნაბიჯების გადადგმისაკენ მოუწოდებენ. მათი განცხადებით, მცოცავი ოკუპაცია ამ დრომდე გრძელდება და ხელისუფლებამ საერთაშორისო ორგანიზაციების დახმარებით ეს პროცესი უნდა შეაჩეროს.

„ჩვენ მშვიდობიან ბრძოლას განვაგრძობთ რუსეთის წინააღმდეგ. უნდა დავიბრუნოთ ჩვენი დაკარგული ტერიტორიები და შემოვირიგოთ ჩვენი ძმები, ოსები. იმედი გვაქვს, რომ ყოველივე ამაში დაგვეხმარებიან ჩვენი ევროპელი მეგობრები.“-აცხადებს აქციის ერთ-ერთი მონაწილე ციცინო შოშიაშვილი.

აქციას შეუერთდნენ პოლიტიკოსებიც. ერგენეთში „ევროპული საქართველოს“ ლიდერი, დავით ბაქრაძე ჩავიდა. აქციაზე მივიდნენ „ერთიანი ნაციონალური მოძრაობის“ ადგილობრივი ორგანიზაციის წევრები, რომლებმაც რუსეთთან მიმართებაში საქართველოს ხელისუფლების პოლიტიკა გააკრიტიკეს.