"საქმე არის რაღაცა ტიპის ვაჭრობაში" - იუსტიციის უმაღლეს საბჭოს არამოსმართლე წევრები გაუსაუბრებების გაჭიანურებაზე საუბრობენ

პოლიტიკა - 10:39, 07 Aug, 2019

774

იუსტიციის უმაღლეს საბჭოში უზენაესი სასამართლოს მოსამართლეობის კანდიდატების გასაუბრებები გრძელდება. დღეს საბჭოში საკონსტიტუციო სასამართლოს მოსამართლე ნუგზარ სხირტლაძეს და უზენაესი სასამართლოს ყოფილ მოსამართლეს თამარ ლალიაშვილის მოუსმენენ. საბჭოს არამოსამართლე წევრები პროცესის განგებ გაჭიანურებაზე საუბრობენ.

საბჭოს არამოსამართლე წევრი ანა დოლიძე რაიმე ტიპის ვაჭრობას არ გამორიცხავს.

„საჭირბოროტო საკითხი დღეს არის კენჭისყრის თარიღი. როდის შედგება იუსტიციის საბჭოს სხდომა როდესაც ჩვენ კენჭი უნდა ვუყაროთ კანდიდატებს და 20 პიროვნებიანი სია გადავაგზავნოთ საქართველოს პარლამენტში. სამწუხაროდ, იუსტიციის საბჭოს უმრავლესობა ამ ეტაპზე ამ თარიღს არ სვამს. საქმე არის რაღაცა ტიპის ვაჭრობაში სახელმწიფო ხელისუფლებასთან, მათ შორის, მაგალითად, პარლამენტთან, ან კიდევ მცდელობაში, რომ წნეხი მოახდინონ ჩემზე და ნაზიზე,“- განაცხადა დოლიძემ.

ნაზი ჯანეზაშვილი კი დარწმუნებულია, რომ საბჭოს მოსამართლე წევრებს მათთვის სასურველი კონკრეტული სახელები და გვარები უკვე შერჩეული აქვთ.

„ვის აირჩევენ ცხადია, წინასწარ არავინ არ იცის, თუმცა ალბათ ამ კლანს რაღაცა კონკრეტული სახელები და გვარები უკვე განსაზღვრული აქვს, მაგრამ ამ ეტაპისთვის ჩემთვის უცნობია, როდის უყრის კენჭს იუსტიციის უმაღლესი საბჭო შერჩეულ კანდიდატურებს, იმისათვის, რომ წარადგინონ საქართველოს პარლამენტში. არც კი მოსვლიათ აზრად იუსტიციის უმაღლესი საბჭოს წევრებს, რომ რაღაცა პერიოდულობით ჩატარებულიყო გასაუბრება, იმისათვის, რომ დრო გვქონოდა თუნდაც კანდიდატებთან გასაუბრების შედეგების ანალიზისთვის,“- განაცხადა ჯანეზაშვილმა.