ივანიშვილის გადაწყვეტილებით, გურიის ზღვისპირა კურორტები სანაპირო ზოლით ერთმანეთს ვეღარ დაუკავშირდება

პოლიტიკა - 18:04, 06 Aug, 2019

3203

ოპოზიციის ინფორმაციით, ბიძინა ივანიშვილის გადაწყვეტილებით, გურიის შავი ზღვისპირა კურორტები სანაპირო ზოლით ერთმანეთს ვეღარ დაუკავშირდება.
ხელისუფლების ოპონენტების თქმით, ყოფილმა პრემიერმა თავის საცხოვრებელთან, დაახლოებით, ნახევარკილომეტრიანი სანაპირო ზოლის აღება და სახლთან ზღვის გადატანა გადაწყვიტა.

„მას შემდეგ, რაც ჩვენ გავრილოვის ღამის გამო, ყოველ ღამით დავიწყეთ პერმანენტული აქციების მოწყობა ბიძინა ივანიშვილის სახლთან სახელწოდებით - "გააღვიძე ოლიგარქი", ის ოლიგარქი ცდილობს, ყველანაირად შეგვიშალოს ხელი, ჯერ გადათხარა, ხელოვნური ბარიერები მოაწყო. მაგრამ, მას შემდეგ, რაც აღმოაჩინა, რომ ჩვენ არ გავჩერდებით და ვაპირებთ პროტესტის გაგრძელებას, როგორც ჩანს, მის ფანტაზიას საზღვრები არ აქვს და დაიწყო ზღვის საცხოვრებელ სახლთან მიყვანა იმისთვის, რომ ჩვენ არ მოგვეცეს საშუალება, დავდგეთ და გავაპროტესტოთ. ბუნებრივია, ზღვაში ვერ დავდგებით და ვერ გავაპროტესტებთ,“ - განაცხადა ”ნაციონალური მოძრაობის” წევრმა, დავით მჟავანაძემ.

ამასთან, აქციის მონაწილეები დღეიდან ოლიგარქის სახლთან მიახლოებას ვეღარ შეძლებენ, რადგან იმ მიწაზე, სადაც აქციები ტარდებოდა, უკვე ზღვაა მიყვანილი.

„ეს არის წარმოუდგენელი მარაზმია. რისთვის? იმისთვის, რომ ადამიანები გამოხატავენ სამართლიან პროტესტს, რომ გაუშვას გახარია. ამისთვის, ზღვა უნდა მოიყვანოს სახლამდე, ამისთვის უნდა გადააადგილო ყველაფერი, რაც შენ გინდა, იმისთვის რომ მომიტინგეებს ხელი შეუშალო. სირცხვილია უბრალოდ, მეტი არაფერი. გახარია უნდა წავიდეს, ზღვა, წყალი, ხმელეთი ეკუთვნის ხალხს,“ - აცხადებს ბონდო თედორაძე.