„ქართული ოცნების“ თავმჯდომარის მოადგილე, დავით მათიკაშვილი ლარის კურსის ვარდნას კვლავ ქვეყანაში მიმდინარე პოლიტიკურ პროცესებს და ოპოზიციას უკავშირებს.

დეპუტატის შეფასებით, ხელისუფლება ლარის კურსს დასტაბილურებას მოახერხებს.

„ლარს მცურავი კურსი გააჩნია, მასზე აისახება შესაბამისი მოვლენები, ის ნეგატიური მოვლენები, რომელიც საქართველოში მიმდინარეობდა, ცხადია, მან ჰპოვა ლარის კურსზე ასახვა, თუმცა საქართველოს ეროვნული ბანკი და ეკონომიკური გუნდი შესაბამისი პოლიტიკის განხორციელებით მიდის იმ ნიშნულამდე, რომ ლარი, რა თქმა უნდა, დააბრუნოს თავის ბუნებრივ ამპლიდუდაში. ეს დროის ფაქტორია, დარწმუნებული ვარ ამ კუთხით ყველაფერი იქნება ძალიან კარგად,“- განაცხადა დავით მათიკაშვილმა.

ეროვნული ვალუტა ისევ გაუფასურდა. ლარის ოფიციალური ღირებულება გუშინ 2.89 გახდა. დღეს კი სავალუტო ბაზარზე ლარი ვარდნას კვლავ განაგრძობს.