პრემიერ-მინისტრს აჭარაში, ბეშუმში საპროტესტო აქციით დახვდნენ. ”გახარია ჯალათო! სისხლიანო გახარია, წადი,” - ამ მოთხოვნით გამართეს დღეს აქცია ”ნაციონალური მოძრაობის” წევრებმა და სამოქალაქო აქტივისტებმა.

შეკრებილებმა შუამთობის დღესასწაულზე მისულ მამუკა ბახტაძეს შინაგან საქმეთა მინისტრის, გიორგი გახარიას თანამდებობიდან გათავისუფლება მოსთხოვეს. პოლიციამ აქციის მონაწილეებს პრემიერთან მიახლოების საშუალება არ მისცა, რასაც ხმაური და დაპირისპირება მოჰყვა.

„ჩვენ გვქონდა მცდელობა, რომ ახლოს მივსულიყავით პრემიერთან და გვეთქვა იმ აქციის შესახებ, რომ გახარია უნდა წავიდეს, თუმცა ნახეთ, რომ პოლიციამ გადაგვიკეტა გზა, ძალადობს პოლიცია, რომ კომფორტი შეუქმნას პრემიერს და ახლოს არ მიგვიშვას. როგორც ჩანს, ეს არის დღესასწაული მხოლოდ ქართული ოცნების და პრემიერის, ისე როგორც დააბრმავეს ხალხი, ისე არის დღეს მთავრობა დაბრმავებული და დაყრუებული, არ ესმის ამ ხალხის“ - აცხადებს აჭარის ავტონომიური რესპუბლიკის უმაღლესი საბჭოს ფრაქცია ”ერთიანი ნაციონალური მოძრაობის” თავმჯდომარე, ელგუჯა ბაგრატიონი.

აქციის მონაწილეების განცხადებით, გიორგი გახარიას გავრილოვის ღამის მოწყობა არ ეპატიება.

„ახალგაზრდები მართავენ მშვიდობიან აქციას სისხლიანი გახარიას ბანერით, სადაც წერია, რომ გახარია უნდა წავიდეს. გავრილოვის ღამე მას არ ეპატიება. თუმცა, პოლიცია სრულ პანიკაშია, ამოიყვანეს ზონდერები, რომლებსაც არც ფორმა აცვიათ და არც დოკუმენტი არ წარმოუდგენიათ. ბავშვს გადაუარეს და დააზიანეს. ამიტომ უნდა დასრულდეს კრიმინალური, ქოცური მმართველობა“ - აცხადებს მიხეილ ბოლქვაძე.