არცერთი გამამართლებელი განაჩენი და სკანდალური საქმეები - ვინ არის მოსამართლე ნინო სანდოძე, რომელსაც „სამართლის მაფიოზს" უწოდებენ

პოლიტიკა - 18:57, 02 Aug, 2019

3848

იუსტიციის უმაღლესი საბჭოში ამ წუთებში თბილისის სააპელაციო სასამართლოში უვადოდ გამწესებულ მოსამართლეს ნინო სანდოძეს უსმენენ. ეს უკანასკნელი უზენაესი სასამართლოს მოსამართლეობის კანდიდატია.

როგორც სანდოძემ გასაუბრების დასაწყისში საბჭოს წევრებს უთხრა, მისთვის და მისი ოჯახისთვის, სასამართლო უცხო არ არის.

მისივე თქმით, მისი წარსულიც და დღევანდელობაც უკავშირდება სასამართლოს.

სწორედ მოსამართლე სანდოძის სამოსამართლეო წარსული არ არის სანდო იუსტიციის უმაღლესი საბჭოს არამოსამართლე წევრებისთვის.

როგორც „ნიუპოსტს“ იურისტები უყვებიან, ნინო სანდოძე მოსამართლეთა ე.წ კლანში ის ოდიოზური ფიგურაა, რომლებსაც სასამართლო წრეებში „სამართლის მაფიოზებადაც“ კი მოიხსენიებენ.

ნინო სანდოძე იყო პირველი ინსტანციის სასამართლოში, სადაც 2006 წელს ნიკა ლომინაძის მკვლელობის საქმეზე უვადო პატიმრობა მიუსაჯა გია გვიჩიანსა და ნიკა ჩემიას, რომლებიც 2017 წელს უდანაშაულოდ ცნეს და სასამართლოს დარბაზიდან გაათავისუფლეს.

წინა ხელისუფლების პირობებში მას არც ერთი გამამართლებელი განაჩენი არ გამოუტანია.

„მეგობრებო, უზენაესი სასამართლოს მოსამართლეობის მსურველია მოსამართლე ნინო სანდოძე- ადამიანი ვინც უვადო პატიმრობა მოუსაჯა აწ უკვე გამართლებულ გია გვიჩიანს, პატიმრობა მოუსაჯა შალვა რამიშვილს და დავით კოხრეიძეს, გაასამართლა ბადრი ბიწაძე 2011 წლის 26 მაისისათვის. კიდევ რამ თუ არ მახსოვს გამახსენეთ. მაგრამ მგონი საკმარისია, სამართლიანობა აღდგა“- აღნიშნა ნინო სანდოძის შესახებ საუბრისას ანა დოლიძემ.

ცნობისთვის, უზენაეს სასამართლოში მოსამართლის 10 ვაკანტურ პოზიციაზე უვადოდ განთავსებისთვის 144 კანდიდატი იბრძვის. მათ შორის არიან ისეთი კანდიდატები, რომელსაც ჯანეზაშვილი და დოლიძე, ასევე არასამთავრობო ორგანიზაციები ბრალს "კლანის წევრობაში" სდებენ.