სახალხო მოძრაობა „ტრიბუნას“ ლიდერი, ისნის რაიონის მაჟორიტარი დავით ჭიჭინაძე ლარის რეკორდულ გაუფასურებაზე ეროვნული ბანკის პრეზიდენტის შეფასებას ეხმაურება.

„ეროვნული ბანკი ლარის ორმოცს გადაიხდის და ხვალიდან, ალბათ გამოჯანმრთელდება, რადგან როგორც ეროვნული ბანკის პრეზიდენტი გვარწმუნებს, მილევადი პროცესები ყოფილა,“ - ამბობს ჭიჭინაძე.

მისივე თქმით, სანამ ბანკთაშორის ბირჟა არსებობდა, ჩვენთან ვალუტა სტაბილური და პროგნოზირებადი იყო, მაგრამ როგორც კი გაჩნდა „ბლუმბერგი“, მას შემდეგ დაიწყო რყევები და არასტაბილური კურსი.

„დღეს „ბლუმბერგზე“ ვაჭრობენ და ამ ვაჭრობაში ბანკები არასოდეს წაგებული არ არიან. მათი შემოსავალი კი, ასეთი სავალუტო ოპერაციებით, წელიწადში რამდენიმე ასეული მილიონია. გამოდის, რომ ბანკები ამით უფრო მეტ სარგებელს ნახულობენ, ვიდრე პირდაპირი საქმიანობით. ფიზიკური პირების და ბიზნესის დაკრედიტებას თუ განვასხვავებთ ერთმანეთისგან, ყველაზე დიდი წილი მოგება, ბანკებისთვის, მოდის სავალუტო ოპერაციებზე, ჯარიმებზე და მომსახურების გადასახადებზე და არა პრაქტიკულად ბანკის ოპერაციებზე, რომელიც წესით მეტი შემოსავალი უნდა იყოს. ამიტომ ვაცხადებ, რომ ბანკების მოგებების შემადგენელი ნაწილიც, ყოველთვის არის სპეკულაციური.

მაგალითისთვის: თუ გვეზრდება ლარის კურსი და მოსახლეობა ხელფასს იღებს ლარში, კრედიტები კი, აღებულია დოლარში, ე.ი. დასახარჯად ფული არ რჩება. თანხები ყოფნის კრედიტის მოსამსახურებლად და რაღაც ელემენტარულის შესაძენად. შედეგად, მოსახლეობა ღარიბდება და ეკონომიკაც არ იზრდება. ამიტომ, ნახევარპროცენტიანი ბრუნვის გადასახადიც რომ დაწესდეს დოლარზე, კომერციულ ბანკებს დღეში ხუთჯერ ყიდვა-გაყიდვის და კურსის თამაშის სურვილი ნამდვილად დაეკარგებათ და ლარის გაუფასურების სპეკულაციური ფაქტორიც მოისპობა“, - აცხადებს ჭიჭინაძე.