მომგებიანი კორუფცია - "შონიამ გააცნობიერა, რომ ივანიშვილი კარგავს ბერკეტებს და დასთანხმდა გარიგებას"- ზოდელავა

პოლიტიკა - 16:46, 30 Jul, 2019

1933

თბილისის საქალაქო სასამართლომ სამეგრელო-ზემო სვანეთის ყოფილი გუბერნატორი დამნაშავედ ცნო და სახელმწიფო ბიუჯეტის სასარგებლოდ 10 ათასი ლარის ოდენობის ჯარიმის გადახდა დაეკისრა.
ფაქტს "ნაციონალური მოძრაობის" ერთ-ერთი ლიდერი მურთაზ ზოდელავა "ნიუპოსტთან" გამოეხმაურა და აღნიშნა, რომ ლევან შონიამ ბრალი აღიარა, რადგან ოპოზიციონერის თქმით, საპროცესო გარიგება აღიარების გარეშე არ არსებობს.

"შონიამ ძალიან კარგად გააცნობიერა, რომ ივანიშვილი ძალიან მალე დაკარგავს ბერკეტებს, მათ შორის პროკურატურაში და ამიტომ იძულებული გახდა ბრალი ეღიარებინა, იმის იმედად, რომ მხოლოდ პირობითი მსჯავრით გამოძვრებოდა.
მან ზუსტად იცის, რომ მალე შეიცვლება ხელისუფლება, რომ მალე მას ამ საქმეზე ძალიან მძიმედ მოსთხოვდნენ პასუხს ობიექტური გამოძიების პირობებში და ყველაფრის თავის ასარიდებლად გააკეთა ის რაც გააკეთა.
მას აქვს ძალიან კარგი გრძნობა თუ როდის იცვლება ხელისუფლება, იცის რომ ივანიშვილი მალე წავა და ამიტომ წავიდა ამ გარიგებაზე"- აღნიშნა ენმ-ს ლიდერმა.
ზოდელავა დარწმუნებულია, რომ ლავან შონიას დანაშაული ჩადენილი აქვს.
"შონიას 10 000 დოლარის ქრთამის აღებას ედავებოდნენ, ყველამ მოვისმინეთ ფარულ ჩანაწერებში, ერთ-ერთი მეწარმე როგორ ამბობდა როგორ გადაიხადა 10 000 ქრთამი, პროკურატურამ კი 10 000 ლარის გადახდა დააკისრა. სოციალურ ქსელში რამდენიმე გამოხმაურებას მივადევნე თვალი და ერთ-ერთი ყველაზე კურიოზულია შეფასება, რომლის მიხედვითაც ამ მოხელემ აიღო 10 000 დოლარი ქრთამის სახით, საპროცესო შეთანხმება კი 10 000 ლარზე გაუფორმდა, სახლში კი 18 000 ლარი წაიღო. და მომგებიანია კორუფციაო"- თქვა ზოდელავამ.