თბილისის მერმა კახა კალაძემ ჟურნალისტების კითხვაზე ირაკლი ოქრუაშვილის დაკავებასთან დაკავშირებით უპასუხა.

მისი თქმით, თავდაცვის ყოფილი მინისტრი საინტერესო ფიგურა არ არის, რომ მასზე შეფასებები გააკეთოს.

„ზოგადად, არ არის ირაკლი ოქრუაშვილი საინტერესო ფიგურა, რომ მე დავდგე და კომენტარები გავაკეთო ამასთან დაკავშირებით. ჩვენ ვნახეთ კადრები 20 ივნისის შევარდნასთან დაკავშირებით და შესაბამისი უწყებები მოქმედებენ ისე, რომ ყველამ გასცეს ჩადენილ დანაშაულს პასუხი. დეტალებში გამიჭირდება შესვლა, თუ რა მუხლია, რა ბრალეულობაა. ეს შეგიძლიათ, დაუსვათ შესაბამის სამსახურებს და გაგცემთ პასუხს. მე მზად ვარ, როგორც დედაქალაქის მერი, ზოგადი შეფასებები გავაკეთო პოლიტიკურ პროცესებზე. ყველა ვთანხმდებით იმაზე, რომ ხელისუფლების ცვლილება უნდა მოხდეს არჩევნების გზით და წარსულს უნდა ჩავაბაროთ დაპირისპირება, გადატრიალება, სისხლისღვრა, მოწოდებები, რასაც 20-21 ივნისს ვისმენდით უპასუხისმგებლო პოლიტიკოსების მხრიდან. ისინი იქ გულწრფელად მისულ ადამიანებს მოუწოდებდნენ, შტურმით აეღოთ პარლამენტის შენობა და ეს კანონის წინაშე არავის უნდა ეპატიოს პოლიტიკოსი იქნება თუ რიგითი მოქალაქე. ეს არის ძალიან ცუდი, მძიმეა, რაც ვნახეთ" - აღნიშნა კახი კალაძემ.