"მე ასე მგონია, კარგი იურისტია..." - იუსტიციის საბჭოში მიხეილ ჩინჩალაძის ყოფილ თანაშემწეს უსმენენ

პოლიტიკა - 12:48, 29 Jul, 2019

855

იუსტიციის საბჭოში 2 საათზე მეტია რაც უზენაესი სასამართლოს მოსამართლეობის კანდიდატ მერაბ ლომიძეს უსმენენ. ის რიგით 25-ე კანდიდატია. სულ კი საბჭომ 50 კანდიდატს უნდა მოუსმინოს.

იუსტიციის უმაღლესი საბჭოს არამოსამართლე წევრის, ნაზი ჯანეზაშვილი პოლიტპატიმრების საკითხს შეეხო.

ჯანეზაშვილი დაინტერესდა, რას ნიშნავს, მოსამართლეობის კანდიდატის აზრით, რომ ადამიანი იყოს პოლიტპატიმარი.

ამაზე პასუხად მერაბ ლომიძემ აღნიშნა, რომ პოლიტიკური ნიშნით დაკავებული პირი მოიაზრება პოლიტპატიმარში.

„სამართლებრივი ტერმინი პოლიტიკური პატიმარი მე არსად მინახავს და არ გამიგია. პატიმარი ზოგადად, ან არის კანონიერად პატიმარი, ან თუ უკანონოდ დადასტურდა და გაამართლებენ, გამოდის, რომ არის უკანონო პატიმარი,“ - განაცხადა ლომიძემ.

მერაბ ლომიძე 2007 წელს იყო მიხეილ ჩინჩალაძის თანაშემწე და ჯანეზაშვილმა აქედან გამომდინარე დაინტერესდა, თუ რა როლი ითამაშა საბჭოს მოქმედმა მდივანმა მის კარიერაში.

„ზოგადად, ბატონ მიშასთან, ბუნებრივია, ამ პერიოდში მქონდა ურთიერთობა, როგორც თანაშემწეს, ბატონი მიშა არის ერთ-ერთი პროფესიონალი თავის საქმეში, მე ასე მგონია, კარგი იურისტია. ახლა გავლენა, რამდენიმე თვის განმავლობაში, ბუნებრივია, გარკვეულ საქმესთან დაკავშირებით მქონდა ურთიერთობა, მაგრამ რამდენიმე თვე ვიყავი თანაშემწე, თუმცა, ის პერიოდი საკმაოდ ნაყოფიერი იყო,“ - განაცხადა ლომიძემ.