აჭარის უმაღლესი საბჭოს ფრაქცია „ერთიანი ნაციონალური მოძრაობის“ თავმჯდომარის, ელგუჯა ბაგრატიონის ოზურგეთის პოლიციაში დაბარების ფაქტს ლევან ვარშალომიძე საგანგებო ბრიფინგზე ოპოზიციის სხვა წარმომადგენლებთან ერთად გამოეხმაურა.

„დღეს ქვეყანაში ბიძინა ივანიშვილმა საბოლოოდ დაამყარა დიქტატურა. ნაცვლად იმისა, რომ პასუხისგებაში მისცემოდნენ გავრილოვის ღამის შემოქმედები, ბიძინა ივანიშვილმა სისხლის სამართლის საქმეები აღძრა პოლიტიკური ოპონენტების მიმართ და აპატიმრებს მათ.

დღეს, 12:00 საათზე, სისხლის სამართალის კოდექსის 187-ე მუხლით აღძრულ საქმეზე ბრალის წარდგენის მიზნით ოზურგეთის პოლიციაში დაბარებულია უმაღლესი საბჭოს ფრაქცია ენმ-ის თავმჯდომარე ელგუჯა ბაგრატიონი, რომელსაც ბრალი უნდა წარუდგინონ თითიდან გამოწოვილი მიზეზით, თითქოს მან დააზიანა ბიძინა ივანიშვილის სათვალთვალო კამერა და ამით მნიშვნელოვანი ზარალი მიაყენა მილიარდერ ოლიგარქს.

მსგავსი სისხლის სამართლის საქმეები წარმოებს მხოლოდ და მხოლოდ ჩრდილოეთ კორეასა და რუსეთში.

სინამდვილეში საზოგადოების აბსოლუტურ უმრავლესობას კარგად ესმის, რომ ხელისუფლება აგონიაშია და იგი გამოსავალს ხედავს პოლიტიკური ოპონენტების დაპატიმრებებსა და სისხლის სამართლის საქმეების აღძვრაში.

ხელისუფლებას უნდა ესმოდეს, რომ ქართველი ხალხი არ შეეგუება ოკუპაციას. არავის ეშინია არც სისხლის სამართლის საქმეების აღძვრისა და არც დაპატიმრების.

მოვუწოდებთ ხელისუფლებასა და ბიძინა ივანიშვილს: თუ კიდევ შერჩათ ადეკვატურობის ნიშან-წყალი, დაუყოვნებლივ ხელი აიღონ ადამიანების პოლიტიკური ნიშნით დევნაზე, თანამდებობიდან გადააყენონ სისხლიანი გახარია და პოლიტიკურ ოპონენტებთან დასხდნენ მოლაპარაკების მაგიდასთან, სადაც შევთავაზებთ ქვეყნის კრიზისიდან გამოსვლის გეგმას.

ეს გეგმა მდგომარეობს შემდეგში:

1. დაუყოვნებლივ გათავისუფლდნენ 20-21 ივნისის აქციის გამო პოლიტიკური ნიშნით დაპატიმრებული ადამიანები;

2. დაუყოვნებლივ გადავიდეს ქვეყანა პროპორციულ საარჩევნო სისტემაზე და მოწესრიგდეს საარჩევნო კანონმდებლობა, რაც საფუძველს მოგვცემს ქვეყანაში დემოკრატიული, თავისუფალი არჩევნების ჩატარებისა;

3. ამის შემდგომ დაინიშნოს ქვეყანაში ვადამდელი საპარლამენტო არჩევნები.

წინააღმდეგ შემთხევაში, საფრთხე ემუქრება არა რომელიმე პოლიტიკურ პარტიას, არამედ ამ ქვეყნის მომავალსა და მის დასავლურ კურსს, რასაც არ დაუშვებს ჩვენი ქვეყნის მოსახლეობა“, – განაცხადა ლევან ვარშალომიძემ.