ყოფილი თავდაცვის მინისტრისა და მოძრაობა „გამარჯვებული საქართველოს“ ლიდერის ირაკლი ოქრუაშვილის დაკავებას პარლამენტის თავმჯდომარე, არჩილ თალაკვაძე გამოეხმაურა.

თალაკვაძის თქმით, მათ ვინც საკანონმდებლო ორგანოში ძალადობრივი გზით შეჭრას ცდიობდა ან ამას აორგანიზებდა, კანონის წინაშე პასუხისმგებლობა მოუწევთ, ირაკლი ოქრუაშვილს კი თუ მართალია ამის დამტკიცება სასამართლოზე შეეძლება.

„ძალიან სამწუხაროა, როგორც განვითარდა მოვლენები 20 ივნისის დროს და შემდეგ დღეებში. მეორე მხრივ, მსოფლიოში არცერთი დემოკრატიული სახელმწიფო და არცერთი დემოკრატიული სახელმწიფოს საზოგადოებას არ სურს ნახოს ის, რომ მის კონსტიტუციურ წესრიგზე მოქალაქეების უსაფრთხოებასა და პარლამენტზე არის ძალადობრივი შეტევა, ვინც ამაში მონაწილეობდა, ვინც ამას აორგანიზებდა და ეს დაუდასტურდება სასამართლოში, ბუნებრივია, ის პასუხისმგებელი იქნება კანონის წინაშე, მაგრამ ყველას ექნება საშუალება, რომ დაცვის უფლებით ისარგებლოს, თუ არის მართალი, თავის სიმართლე დაამტკიცოს სასამართლოში.“ - განაცხადა არჩილ თალაკვაძემ.