„შაბათის კურიერი“ ავრცელებს ინფორმაციას იმის შესახებ, რომ გლდანის ციხეში 37 წლის პატიმარი შემოაკვდათ, რომელსაც სასჯელის ვადა უახლოეს მომავალში უმთავრდებოდა.

გარდაცვლილი პატიმრის ოჯახი ამტკიცებს, რომ ის გლდანის ციხეში შემოაკვდათ. გასულ კვირას ოჯახს, რომელიც ფსიქიკური პრობლემების მქონე მსჯავრდებულის გათავისუფლებას დღევანდელ პროცესზე ელოდა, დაურეკეს და უთხრეს, რომ წინასწარ პატიმრობაში მყოფი 37 წლის გოგიტა ჯავახიშვილი გარდაცვლილია და ის უნდა გადაასვენონ.

ციხის ადმინისტრაცია ამტკიცებს, რომ პატიმრის სიკვდილის მიზეზი გულის შეტევაა, ოფიციალურ ვერსიას არ ენდობდა ოჯახი. ნათესავები დარწმუნებულები არიან, რომ ფსიქიკური პრობლემების მქონე პატიმარი ბადრაგს ცემის დროს შემოაკვდა.

"ბავშვს თავი აქვს გადახსნილი... ბეჭებზე დალურჯებული აქვს... თავზე რომ სისხლი გამოსდის, ეგ კი დავინახე, გაჟღენთილიც არის ტახტი,“ - ამბობს გარდაცვლილის დედა."

საქმეში რამდენიმე საეჭვო გარემოებაა. ჭირისუფლები „კურიერთან“ ყვებიან, რომ ცხედრის დათვალიერების დროს აღმოაჩინეს ძალადობის ნიშნები თავისა და ზურგის არეში. მათივე მტკიცებით, სხეულზე არსებული გვამური ლაქები მეტყველებდა იმაზე, რომ გოგიტა ჯავახიშვილის გარდაცვალების შესახებ ოჯახს გვიან შეატყობინეს.

ფსიქიკური აშლილობის მქონე პირი პოლიციამ მაისში ოჯახური ძალადობის ნიადაგზე დააკავა. მას შემდეგ დაკავებული აღარავის უნახავს. აღკვეთი ღონისძიებაც დაუსწრებლად შეეფარდა. ოჯახი ამტკიცებს, რომ ბრალდებული ჯერ სხვა პატიმრებთან ერთად ჰყავდათ, კონფლიქტის გამო კი სამარტოო საკანში გადაიყვანეს.

იხილეთ ვრცლად ვიდეო: rustavi2.ge