საოკუპაციო რეჟიმი სოხუმის აეროპორტის ამოქმედებას და რუსეთიდან ფრენების დაწყებას გეგმავს - აფხაზეთი როსტოვის საჰაერო ზონაშია შეყვანილი

პოლიტიკა - 10:55, 27 Jul, 2019

1472

აფხაზეთის საოკუპაციო რეჟიმის მედიის მიერ გავრცელებული ინფორმაციით, სოხუმის აეროპორტი საერთაშორისო რეისებისთვის აღდგება. ამის შესახებ გადაწყვეტილება კი ოკუპირებული აფხაზეთის დეფაქტო მინისტრთა კაბინეტის სხდომაზე იქნა მიღებული, თუმცა ზუსტი თარიღი არ დასახელებულა. ე.წ მინისტრებმა მხარი დაუჭირეს აეროპორტისთვის ერთობლივი ბაზირების აეროდრომის სტატუსის მინიჭებას, რომელიც მათი თქმით საშუალებას მისცემს აეროდრომი გამოყენებული იქნას როგორც სამოქალაქო ავიაციის, ასევე სამხედრო, საგანგებო, სანიტარული და სხვა ძალოვანი სტრუქტურების მიერ. აეროპორტის რეორგანიზაციის პროექტს რუსი ინვესტორი აფინანსებს.

ე.წ მთავრობის სხდომაზე მიღებული იქნა აეროპორტისთვის კოდის მინისჭების პროექტიც. საოკუპაციო რეჟიმი და რუსეთის ხელისუფლება შეთანხმდა რომ სოხუმის აეროპორტს მიენიჭება 4-ასოანი კოდი URAS. საიადანაც U- საერთოა ყველა პოსტსაბჭოთა ქვეყნისთვის, R- ნიშნავს რომ აეროპორტი შედის როსტოვის საჰაერო ზონაში, A- აფხაზეთი და S- სოხუმი.

დე ფაქტო პრეზიდენტის რაულ ხაჯიმბას განცხადებით, როსტოვის საჰაერო ზონაში ყოფნა აფხაზეთს საშუალებას მისცემს ისარგებლოს ფრენების საკონტროლო ცენტრით და სადისპეჩერო სამსახურით.

ხაჯიმბას თქმით, ის რომ სოხუმის აეროპორტი როსტოვის საჰაერო ზონასაა მიკუთვნებული ეს რესპუბლიკის სუვერენიტეტს არ ზღუდავს.

ე.წ მინისტრთა კაბინეტის სხდომაზე ნათქვამი იყო ისიც, რომ მათ უკვე ჰყავთ 4 დისპეჩერი, რომლებმაც განათლება რუსეთში მიიღეს აფხაზეთის ე.წ თავდაცვის უწყების დაკვეთით.