ხაზარაძე და ჯაფარიძე ანაკლიის მმართველ საბჭოში ხელმძღვანელ პოსტებს ტოვებენ

პოლიტიკა - 16:05, 26 Jul, 2019

885

ტიბისი ბანკის დამფუძნებელი და ანაკლიის პროექტის მმართველი საბჭოს თავმჯდომარე მამუკა ხაზარაძე აცხადებს, რომ ის ანაკლიის მმართველი საბჭო თავმჯდომარის თანამდებობას დატოვებს, ბადრი ჯაფარიძე კი მისი მოადგილის პოსტს. ხაზარაძის თქმით ეს გადაწყვეტილება იმის გამო იქნა მიღებული, რომ ანაკლიის სასიცოცხლო პროექტს მათ გამო ხელი არ შეეშალოს და ხელისუფლებას აღარ ქონდეს სპეკულაციების საბაბი, რომ ისინი ამ პროექტით იმუნიტეტს იქმნიან. აღნიშნული განცხადება ხაზარაძემ სასამართლოში შესვლამდე გააკეთა, სადაც მისი და ბადრი ჯაფარიძის მიმართ წლების წინანდელ საქმეზე 1-1 მილიონიანი გირაოს დააკისრებაზე უნდა იმსჯელონ.

„მე და ბადრიმ გადავწყვიტეთ, მომავალ კვირას ჩვენ გვექნება პრესკონფერენცია, ჩვენ შევცვლით ანაკლიის მმართველ საბჭოს, ჩვენ გადავიწევით უკანა პლანზე. მე ჩამოვშორდები თავმჯდომარეობას და ბადრი მოადგილეობას, რომ ერთხელ და სამუდამოდ დამთავრდეს სპეკულაცია, რომ ჩვენ რაღაცას ვეფარებით. ამას ვაკეთებთ მხოლოდ და მხოლოდ იმის გამო რომ ეს პროექტი არ გაჩერდეს და ვინმემ არ დაგვაბრალოს რომ ეს სასიცოცხლო პროექტი ჩვენს გამო გაჩერდა. შეუძლებელია ამ პირობებში ელაპარაკო ბანკებს 650 მლნ დოლარის ინვესტიციაზე და პროკურატურა სახალხოდ ასეტ ბრალდებებს გადებდეს.“- განაცხადა მამუკა ხაზარაძემ.