"თითქოს თავის კერძო კომპანიებში იღებდნენ თანამშრომლებს" - ჯანეზაშვილი იუსტიციის საბჭოში მიმდინარე გასაუბრებებას ფორმალურს უწოდებს

პოლიტიკა - 13:53, 26 Jul, 2019

744

იუსტიციის უმაღლეს საბჭოს არამოსამართლე წევრი ნაზი ჯანეზაშვილი მოსამართლეობის კანდიდატებთან გასაუბრებებს ფორმალურს უწოდებს.

დღეს მაია კოპალეიშვილთან და შოთა ლაითაძესთან მოხდება გასაუბრება. ანა დოლიძე კანდიდატების არაკვალიფიციურობაზე საუბრობს და ამბობს:

„ეს პროცესი მოსამართლეების მხრიდან თავიდან ბოლომდე ფორმალურია, მაგრამ ჩვენ გავაკეთეთ ის, რომ როგორი მოსამართლეები ჰყავს ქვეყანას, ამას ხედავს მთელი საქართველო. რამდენიმე კანდიდატმა ვერ გასცა ელემენტარულ სამართლებრივ კითხვებს პასუხი, რაც პრობლემა არის არა მხოლოდ უზენაესისთვის, სადაც ეს ხალხი აპირებს წასვლას, არამედ სასამართლო სისტემისთვის, სადაც ეს ხალხი უკვე მუშაობს და ჩვენს ბედს განსჯის,“- განაცხადა დოლიძემ.

ნაზი ჯანეზაშვილის თქმით, კომისიის წევრები მობილიზებულები მხოლოდ იმ კანდიდატებთან მიმართებაში არიან, რომლებიც მათ ფავორიტებს წარმოადგენენ.

„იუსტიციის უმაღლესი საბჭოს მოსამართლე წევრების დამოკიდებულება პროცესისადმი არის არაჯანსაღი, არასერიოზული, ზედაპირული, მხოლოდ და მხოლოდ იმ კანდიდატებთან მიმართებაში არიან მობილიზებულები, რომლებიც მათი, ასე ვთქვათ, ფავორიტები არიან და ჩანს, რომ ისინი არიან გარკვეულწილად შეთანხმებულები და მე არ მომწონს ის, რომ მაგალითად, საბჭოს წევრები საკითხს უდგებიან როგორც საქმოსნები, თითქოს ისინი თავის კერძო კომპანიებში იღებდნენ თანამშრომლებს,“- განაცხადა ჯანეზაშვილმა.