საქართველოს მთავრობა რუსეთიდან სატრანზიტო ფრენებს 600 ათასი ევროთი დააფინანსებს

პოლიტიკა - 12:00, 25 Jul, 2019

927

საქართველოს მთავრობა რუსეთიდან სატრანზიტო ფრენებს 600 ათასი ევროთი დაასუბსიდირებს. მთავრობის დადგენილების თანახმად რუსეთიდან ერევნის გავლით თბილისისა და ბათუმის მიმართულებით, და პირიქით, ბილეთები 1 მგზავრზე მაქსიმუმ 90 ევროთი დააფინანსდება.

„სტიმულირების ხელშეკრულების მიზნებისათვის პრიორიტეტულ სატრანზიტო მიმართულებებად ითვლება რუსეთის ფედერაცია-ერევანი-ბათუმი-ერევანი-რუსეთის ფედერაციისა და რუსეთის ფედერაცია-ერევანი-თბილისი-ერევანი-რუსეთის ფედერაციის მიმართულებები.

ხელშეკრულების ღირებულება უნდა განისაზღვროს არა უმეტეს 90 (ოთხმოცდაათი) ევროს ოდენობით დღგ-ს გარეშე, თითოეულ ისეთ ჩამომფრენ მგზავრზე, რომელთა მგზავრობაც დაიწყო რუსეთის ფედერაციაში და დასრულდა ალექსანდრე ქართველის სახელობის ბათუმის საერთაშორისო აეროპორტში ან შოთა რუსთაველის სახელობის თბილისის საერთაშორისო აეროპორტში. სტიმულირების პროგრამის ფარგლებში, ორივე მიმართულებისთვის, ჯამური ღირებულება არ უნდა აღემატებოდეს 600 000 ევროს დამატებითი ღირებულების გადასახადის გარეშე.“- აღნიშნულია საქართველოს მთავრობის დადგენილებაში, რომელსაც ხელს პრემიერ-მინისტრი მამუკა ბახტაძე აწერს.

დადგენილება 2019 წლის 24 ივლისს გამოქვეყნდა და ძალაში გამოქვეყნებისთანავე შევიდა.