"ემუქრება თუ არა საფრთხე ანაკლიის პროექტს ასეთი ქმედებების შედეგად მთავრობისგან? რა თქმა უნდა კი" - ანაკლიის განვითარების კონსორციუმის დირექტორი ხაზარაძე-ჯაფარიძის საქმეზე

პოლიტიკა - 10:05, 25 Jul, 2019

1008

"ანაკლიის განვითარების კონსორციუმის" გენერალური დირექტორის ლევან ახვლედიანის განცხადებით, მამუკა ხაზარაძის და ბადრი ჯაფარიძის გარშემო განვითარებული მოვლენები ანაკლიის პროექტზე აისახება და მას სერიოზულ დარტყმას აყენებს. ლევან ახვლედიანის თქმით, მათ დიდი დრო დასჭირდათ, რათა ანაკლიის პორტის პროექტთან მიმართებით ინვესტორების ნდობა კვლავ მოეპოვებინათ, მაგრამ მისი თქმით, არსებულ ვითარებას პროექტის განხორციელების პერსპექტივა ჩიხში შეყავს. ანაკლიის განვითარების კონსორციუმის ხელმძღვანელისთვის გაუგებარია მთავრობის ურთიერთსაწინააღმდეგო განცხადებები და ქმედებები. როდესაც ერთის მხრივ მთავრობა მხარს უჭერს პორტის აშენებას, ხოლო მეორეს მხრივ, კონსორციუმის დამფუძნებლების წინააღმდეგ სამართლებრივ დევნას იწყებს.

„პროცესები, რომელიც ბადრი ჯაფარიძის და მამუკა ხაზარაძის მიმართ მიმდინარეობს პროკურატურის მიერ ვიტყოდი, რომ ხელისუფლების მიერ მათ წინააღმდეგ, არ შეიძლება ეს გამიჯნო და თქვა, რომ ამას ანაკლიის პროექტთან მიმართებაში შედეგი არ მოჰყვება, ეს არის არასწორი.

ისინი არიან მთავარი სპონსორები ამ პროექტის და შესაბამისად, როდესაც მთავარ სპონსორებს ასეთ მძიმე ბრალდებას უყენებენ, თან უსაფუძვლო ბრალდებებს, აბსოლუტურად უსაფუძვლო თითიდან გამოწოვილი ბრალდებებია.

აქედან გამომდინარე, რა თქმა უნდა, ეს ძალიან სერიოზულ დარტყმას აყენებს პროექტს. იყენებს თუ არა მთავრობა პროკურატურას თავისი მიზნების მისაღწევად, ეს ჩემი განსასჯელი არ არის. ემუქრება თუ არა საფრთხე ანაკლიის პროექტს ასეთი ქმედებების შედეგად მთავრობისგან? რა თქმა უნდა კი“ - განაცხადა ახვლედიანმა.

ლევან ახვლედიანის თქმით, პორტის ოპერატორი კომპანია SSA Marine-ის მხრიდან გარკვეული ექსკლუზივის ტიპის მოთხოვნებია, რომ ანაკლია გარკვეული პერიოდით ერთადერთი ღრმაწყლოვანი პორტი იყოს როგორც ახვლედიანი განმარტავს, წერილი, რომელიც 10 დღის წინ ამერიკული ოპერატორის მხრიდან მიიღეს, ამჟამად მთავრობასთან არის გაგზავნილი. მისივე განმარტებით SSA Marine-ს ეს მოთხოვნა ამ დრომდე არ ჰქონია.

„ჩვენ ოპერატორი შემოვატრიალეთ, რომელსაც ძალიან დიდი კითხვის ნიშნები ჰქონდა და დღემდე აქვს პროექტის სრულყოფილ მხარდაჭერასთან დაკავშირებით მთავრობის მხრიდან და განსაკუთრებით ეს გამოწვეული იყო იმისგან, რომ ცალსახაა, რომ ღრმაწყლოვანი პორტი ერთი უნდა იყოს საქართველოში. ამის ბაზარი არ არსებობს, რომ ორი ღრმაწყლოვანი პორტი იყოს. ის, რაც მაისში მოხდა გამოიწვია ჩვენი ამერიკელი ოპერატორის SSA Marine-ის მხრიდან კითხვის ნიშნები, მათ დამატებითი პირობები წააყენეს. 10 დღის წინ ჩვენ წერილი მივიღეთ მათი. ასევე მთავრობასთან გვაქვს გაგზავნილი და აქაც მსჯელობა იგეგმება, თუ როგორ მივაღწიოთ კონსესუსს იმ მოთხოვნებზე, რა დამატებითი მოთხოვნებიც დააყენა ოპერატორმა. ეს გარკვეული ექსკლუზივის ტიპის მოთხოვნებია, რომ ანაკლია გარკვეული პერიოდით ერთადერთი ღრმაწყლოვანი პორტი იყოს. ეს აქამდე არ ყოფილა,ახლა გარკვეული გარანტიები მოითხოვეს“ - განაცხადა "ტვ პირველის" ეთერში ლევან ახვლედიანმა.