„ჩვენი ხელისუფლება არ იყენებს პროკურატურას“ - თურნავა ხაზარაძე-ჯაფარიძის შესაძლო დაკავებაზე

პოლიტიკა - 15:15, 24 Jul, 2019

963

ეკონომიკისა და მდგრადი განვითარების მინისტრი ნათია თურნავა მამუკა ხაზარაძისა და ბადრი ჯაფარიძის მიმართ ბრალის წარდგენის საკითხს ჟურნალისტებთან გამოეხმაურა.
მინისტრის თქმით, პროკურატურის გადაწყვეტილების დაკავშირება ხაზარაძის მიერ დაანონსებულ საზოგადოებრივი მოძრაობის შექმნასთან უადგილოა.

მისივე განცხადებით, პროკურატურა მოქმედებს თავისი პროცედურების შესაბამისად.

"ეს პროცესი, ვინაიდან მაღალ საზოგადოებრივ ინტერესს უკავშირდება, საჯაროა. თქვენ ყველას საშუალება გაქვთ თვალყური მიადევნოთ კანონის აღსრულებას", - განაცხადა თურნავამ.

თურნავას განცხადებით, კანონის წინაშე ყველა თანასწორია.

„ჩვენი ხელისუფლება არ იყენებს პროკურატურას, არ იყენებს სასამართლოს ბიზნესზე ზეწოლისთვის, ეს ჩვენი ხელწერა არ გახლავთ. ვიტყვი, რომ ყველანი თანაბარი ვართ კანონის წინაშე, იქნება ეს საჯარო მოხელე, მთავრობის წევრი, ბიზნესის წარმომადგენელი, აბსოლუტურად რიგითი მოქალაქე. აქედან გამომდინარე, მოთმინებით დაველოდოთ სასამართლო გადაწყვეტილებას", -განაცხადა თურნავამ.

ეკონომიკისა და მდგრადი განვითარების მინისტრის განცხადებით, ანაკლიის პროექტს არაფერი ემუქრება.

"როგორც არაერთხელ განვაცხადეთ, ანაკლიის პროექტი წარმოადგენს ძალიან მაღალი დონის პრიორიტეტს ჩვენი ქვეყნისთვის. ჩვენ ცალსახად გვჭირდება ღრმაწყლოვანი პორტი ანაკლიაში. სახელმწიფოს პროექტის უპრეცედენტო მხარდაჭერა აქვს გაცხადებული და აქედან გამომდინარე, ამ პროექტს არაფერი ემუქრება," - განაცხადა თურნავამ.

მისივე თქმით, ანაკლიის პორტის ინვესტორებს პასუხს სასამართლო გასცემს და უნდა დაველოდოთ სასამართლოს გადაწყვეტილებას.

შეგახსენებთ, რომ გამოძიება დაწყებულია ბევრად უფრო ადრე, ვიდრე ბატონი მამუკა პოლიტიკაში მოსვლასთან დაკავშირებულ გეგმებზე გააკეთებდა განაცხადს, - ასე პასუხობს ეკონომიკისა და მდგრადი განვითარების მინისტრი ნათია თურნავა ჟურნალისტებს მამუკა ხაზარაძისა და ბადრი ჯაფარიძის მიმართ ბრალის წარდგენის საკითხზე.