თსუ-ს საპატიო დოქტორი, რომელმაც სტრასბურგში რუსთავი 2-ს ვერდიქტი გამოუტანა, აფხაზეთს დამოუკიდებელ რესპუბლიკად მიიჩნევს

პოლიტიკა - 17:01, 19 Jul, 2019

16080

სტრასბურგში ადამიანის უფლებათა ევროპული სასამართლოს მიერ "რუსთავი 2"-ის საკითხზე მიღებული გადაწყვეტილება, რომელიც უდავოდ უდიდეს გავლენას მოახდენს საქართველოში მედიის თავისუფლებაზე, შვიდი მოსამართლისგან შემდგარმა პალატამ მიიღო. მასში შედიოდნენ: ანგელიკა ნუსბერგერი (Angelika Nußberger) - თავმჯდომარე (გერმანია) იანკო გროზევი (Yonko Grozev) (ბულგარეთი), ვინსენტ ა. დე გაეტანო (Vincent A. De Gaetano) (მალტა), სიოფრა ო'ლირი (Síofra O’Leary) (ირლანდია), მარტინს მიტსი (Mārtiņš Mits) (ლატვია), ლატიფ ჰუსეინოვი Lәtif Hüseynov (აზერბაიჯანი), ლადო ჭანტურია - საქართველო.

საბოლოო გადაწყვეტილებას 7 მოსამართლიდან მხოლოდ დე გაეტანო არ დაეთანხმა, რომელმაც კოლეგებს შემდეგი ტექსტით მიმართა: "მინდა მჯეროდეს, რომ ჩემი უთანხმოების მიზეზი არის ჩემი, როგორც პროფესიონალი მოსამართლის მგრძნობიარე პოზიცია, ობიექტური მიუკერძოებლობის მიმართ და არა ფაქტი, რომ სასამართლო მოწყვეტილია ეროვნულ დონეზე ცხოვრებისა და სასამართლო განხილვის რეალობას".

აქვე აღვნიშნავთ, რომ ჩვენს მიერ მომზადებული მასალის მიზანი არ არის სტრასბურგის ადამიანის უფლებათა დაცვის სასამართლოს გადაწყვეტილების რევიზია.

თუმცა საინტერესოა პალატის თავმჯდომარის, კიოლნის უნივერსიტეტის პრორექტორის, გერმანელი პროფესორის ანგელიკა ნუსბერბერის პიროვნება, რომელსაც ივანე ჯავახიშვილის სახელობის თბილისის სახელმწიფო უნივერსიტეტის საპატიო დოქტორის წოდება აქვს მინიჭებული.

ინტერესს იწვევს ნუსბერგერის მიერ გამოქვეყნებული რამდენიმე ნაშრომი, რომელიც საქართველოს, აფხაზეთისა და სამხრეთ ოსეთის ურთიერთობებს ეხება და თითქმის ზუსტად ემთხვევა რუსეთის პრეზიდენტ ვლადიმირ პუტინის მიერ რამდენიმე დღის წინ გაკეთებულ განცხადებებს, საქართველოს მიერ აფხაზეთისა და სამხრეთ ოსეთის ოკუპაციის შესახებ.

მისი განცხადებით, 1924 წელს სტალინმა აფხაზეთის დამოუკიდებელი რესპუბლიკა ავტონომიურ რესპუბლიკად "ჩამოაქვეითა" და საქართველოს შეუერთა, როგორც ავტონომიური რესპუბლიკა.

აღნიშნულ საკითხს თავის დროზე გამოეხმაურა ისტორიის მეცნიერებათა დოქტორი ზურაბ პაპასქირი, რომელმაც ნუსბერგერის სტატიას ადექვატური პასუხი გასცა.

უფრო შორს მიდის ანგელიკა ნუსბერგერი ნაშრომში, რომელიც 2008 წლის რუსეთ-საქართველოს ომს ეხება:

"სამხრეთ ოსეთისგან განსხვავებით, აფხაზეთს შეუძლია დაუბრუნდეს დამოუკიდებელი სახელმწიფოებრიობის ტრადიციას. იგი იყო დამოუკიდებელი იმპერია 15-ე საუკუნემდე, სანამ არ დაიპყრო ჯერ ოსმანთა, და შემდეგ რუსეთსი ცარისტულმა იმპერიამ (1810). 1918 წელს აგხაზეთი საქართველოს შეუერთდა. 1921 წელს როდესაც საქართველო ხელახლა დაიპყრო რუსეთის წითელმა არმიამ აფხაზეთი და საქართველო ორ დამოუკიდებელ საბჭოთა რესპუბლკიკად ჩამოყალიბდა. მხოლოდ 1931 წელს დაექვემდებარა აფხაზეთი თბილისის მმართველობას, იგი ჩამოქვეითდა "საბჭოთა რესპუბლიკიდან" "საბჭოთა ავტტონომიურ რესპუბლიკად".

აღსანიშნავია, ისიც რომ ანგელიკა ნუსბერგერი თავის დროზე ტალიავინის კომისიაში სამართლის ექსპერტად მუშაობდა და გარკვეული წვლილი შეიტანა კომისიის დასკვნის მომზადებაში.