სარჩელი ქიბარ ხალვაშის წინააღმდეგ - ოქრუაშვილი ამტკიცებს, რომ "რუსთავი2" მისი საკუთრებაა

პოლიტიკა - 11:30, 19 Jul, 2019

3317

„რუსთავი2“-ის ახალი მფლობელის წინააღმდეგ თავდაცვის ყოფილი მინისტრის ირაკლი ოქრუაშვილის სახელით სარჩელი შეიტანეს. ირაკლი ოქრუაშვილი ამტკიცებს, რომ ტელეკომპანია მისი საკუთრებაა.

ჯერ კიდევ 2016 წელს დაიწყო იმაზე საუბარი, რომ 2010 წლის გერმანიაში ხალვაშსა და ირაკლი ოქრუაშვილს შორის გაფორმდა ხელშეკრულება. საუბარია სკანდალურ დოკუმენტზე, რომლის მიხედვითაც ირკვევა, რომ ბიზნესმენი ქიბარ ხალვაში, რომელიც რუსთავი 2-ზე პრეტენზიას გამოთქვამდა თავად აღიარებს, რომ ტელევიზიის ყველა უფლება ირაკლი ოქრუაშვილს ეკუთვნის.

დოკუმენტი ადასტურებს, რომ ქიბარ ხალვაში ოქრუაშვილის ნომინალური პირი იყო, აღნიშნულ ფაქტს კი ხალვაში, ხელშეკრულებაში საკუთარი ხელმოწერით ადასტურებს. თუ ხალვაში ხელშეკრულებას დაარღვევდა მან ოქრუაშვილს 7 მილიონი დოლარი პროცენტებთან ერთად უნდა გადაუხადოს.

„შეგვაქვს სარჩელი ირაკლი ოქრუაშვილის მოთხოვნა ყადაღის დადებაზე, გუშინ ქიბარ ხალვაში მიერ რეესტრში დარეგისტრირებული "რუსთავი2"-ის წილებზე. ეს არის მოთხოვნა, ყადაღის თაობაზე, სარჩელს შევიტანთ მომდევნო კვირაში და ეს უკვე იქნება ირაკლი ოქრუაშვილისთვის „რუსთავი2“-ისთვის გადაცემის მოთხოვნა. ამის საფუძველი არის შეთანხმება ქიბარ ხალვაშსა და ირაკლი ოქრუაშვილს შორის დაიდო, 2010 წელს ქალაქ ბერლინში, ეს არის ყველაფრის საფუძველი რომ ჩვენ არამარტო ყადაღა დავადოთ წილებს,დავიბრუნოთ ეს ქონება.

2004 წელს გვახსოვს,რომ ირაკლი ოქრუაშვილმა შეიძინა "რუსთავი2"-ის 100%, მაშინ ქიბარ ხალვაში იყო მასთან აფილირებული პირი, ამიტომ ბუნებრივია წილები გადაუფორმა ქიბარ ხალვაშს თანხის მიღების გარეშე.

არავისთვის უცხო არ არის,რომ ქიბარ ხალვაში არამხოლოდ რუსთავი2-ის არამედ სხვა ბიზნესშიც წარმოადგენდა ირაკლი ოქრუაშვილის ინტერესებს.

დღეს ბევრია საუბარი იმაზე, რომ ეს დოკუმენტები ყალბია, ამას ამბობს პაატა სალიაც, რომელიც რა თქმა უნდა ტყუის, არსებობს დადასტურებული მტკიცებულება სამი ექსპერტისა, მათ შორის პარიზის სააპელაციო სასამართლოს ექსპერტისა, რომ ეს არის ნამდვილი, ასევე ჩანიშნულია ექსპერტიზა სამხარაულის ექსპერტიზის ეროვნულ ბიუროში, სადაც არ ცხადდება ბატონი ხალვაში“-ამბობს პოლიტიკური მოძრაობა "გამარჯვებული საქართველოს" ერთ-ერთი დამფუძნებელი ანა რეხვიაშვილი.

ირაკლი ოქრუაშვილის ადვოკატი, გია ზედელაშვილი ამბობს,რომ ამ დოკუმენტების მიხედვით დასტურდება,რომ რუსთავი2-ის წილი შეძენილი იქნა ირაკლი ოქრუაშვილის მიერ ქიბარ ხალვაშის სახელით.ასევე დასტურდება,რომ წილზე საკუთრების უფლება აქვს ირაკლი ოქრუაშვილს და არა ქიბარ ხალვაშს.

ასევე, როგორც ადვოკატი განმარტავს, ქიბარ ხალვაშს არ ჰქონდა უფლებამოსილება ირაკლი ოქრუაშვილთან შეთანხმების გარეშე მოეხდინა რაიმე საქმიანობა "რუსთავი2"-თან მიმართებაში და თუ ამ პირობას დაარღვევდა ის ვალდებულია ირაკლი ოქრუაშვილს გადაუხადოს 7 მილიონი დოლარი. ადვოკატი ამბობს, რომ ქიბარ ხალვაშმა ეს პირობა დაარღვია.