"რუსთავი 2"-ის ყველაზე რეიტინგული გადაცემის "პროფილის" ავტორი და წამყვანი, მაია ასათიანი ამბობს, რომ ეს აღარ არის ბრძოლა მხოლოდ რუსთავი 2-სთვის.

"მიმაჩნია, რომ ეს არის ბრძოლა სამშობლოსთვის. დღეს აქ, ამ ნარინჯისფერ მიკროფონთან სამშობლოს ბედი წყდება, ვიქნებით ტოტალიტარული სახელმწიფო, ყველა ტელევიზია, ყველა რადიო, ყველა გაზეთი ერთ ხმაში ილაპარაკებს თუ კიდევ გვაქვს შანსი, ვიყოთ თავისუფალი და დამოუკიდებელი სახელმწიფო.

ასეთი ტოტალიტარული რეჟიმია რუსეთი, სადაც ყველა ტელევიზია, ყველა ჟურნალისტი ერთი ხმით, ვლადიმერ პუტინის ხმით ლაპარაკობს, ჩვენ არ გვინდა ასეთი ქვეყანა. მე და ჩემი კოლეგები, ის ადამიანები, ის ადამიანური რესურსი, რაც წარმოადგენს რუსთავი 2, ვდგავართ ამ ფასეულობაზე, ამ ფასეულობებისთვის ვიბრძოდით წლების მანძილზე. თქვენ უნდა უპასუხოთ ამ შეკითხვას, რა გინდათ თქვენი შვილებისთვის, გინდათ თავისუფალი საქართველო თუ საბჭოთა რესპუბლიკა. ჩვენ ვართ ის თაობა, 9 აპრილის თაობა, რომელსაც ახსოვს, რომ გამოდიოდა გაზეთი თბილისი და კომუნისტი, ახლაც ასე იქნება"- აცხადებს მაია ასათიანი.