"ლავროვისა და საქართველოს ხელისუფლების განცხადებები, აბსოლუტურ სინქრონშია ერთმანეთთან, მათი მიზანი საპროტესტო მუხტის ჩაქრობაა"

"ლავროვისა და საქართველოს ხელისუფლების განცხადებები, აბსოლუტურ სინქრონშია ერთმანეთთან, მათი მიზანი საპროტესტო მუხტის ჩაქრობაა" - ჭიაბერაშვილი

პოლიტიკა - 13:22, 17 Jul, 2019

789

„ევროპული საქართველის“ წევრი ზურაბ ჭიაბერაშვილი, რუსეთის საგარეო საქმეთა მინისტრის განცხადებას გამოეხმაურა იმასთან დაკავშირებით, რომ საქართველოს ხელისუფლება შეძლებს საზოგადოებრივ-პოლიტიკური სიტუაციის სტაბილიზირებას ქვეყანაში და რუსების უსაფრთხოებასთან დაკავშირებული საფრთხეების აღმოფხვრას. ზურაბ ჭიაბერაშვილის თქმით, რუსეთისთვის მნიშვნელოვანია ჩაახშოს ანტიოკუპაციური განწყობა და ამ მხრივ კრემლის სურვილები საქართველოს ხელისუფლების ინტერესებს ემთხვევა:

„ლავროვისა და საქართველოს ხელისუფლების განცხადებები, აბსოლუტურ სინქრონშია ერთმანეთთან. მათი ამოცანა და მიზანია ქართულ საზოგადოებაში იმ საპროტესტო მუხტის ჩაქრობა და ჩახშობა, რაც უკავშირდება ქართული საზოგადოების მიერ რუსული ოკუპაციისა და ტერიტორიული მთლიანობის დარღვევის მიუღებლობას.

რა თქმა უნდა ამ პროცესში რუსეთისა და საქართველოს ხელისუფლებისათვის მნიშვნელოვანია, რომ ჩაახშოს ყველა ის თავისუფალი არხი, რითაც ქართული საზოგადოების თავისუფლების მოყვარეობა ჩანს, პირველ რიგში ეს არის რუსთავი2 და გასაკვირი არაა, რომ ამ საკითხშიც რუსეთისა და საქართველოს მთავრობის ინტერესი ემთხვევა ერთმანეთს.“

შეგახსენებთ, სერგეი ლავროვმა რუსულ მედიასთან ინტერვიუში იმედი გამოთქვა, რომ საქართველოს ხელისუფლება შეძლებს საზოგადოებრივ-პოლიტიკური სიტუაციის სტაბილიზირებას ქვეყანაში და რუსების უსაფრთხოებასთან დაკავშირებული საფრთხეების აღმოფხვრას. ლავროვის თქმით, კრემლი საქართველოს ხელმძღვანელობისგან ელოდება იმ ზიანისა და საფრთხის მალე გაცნობიერებას, რომელსაც ანტირუსული ისტერიის გამძაფრება მოიტანს.