„როგორც გაბუნიას მონოლოგის შემდეგ გამოვარდა მთელი მთავრობა და დაგმო, ახლაც გამოვიდნენ და დაგმონ ლავროვის მოწოდება“

„როგორც გაბუნიას მონოლოგის შემდეგ გამოვარდა მთელი მთავრობა და დაგმო, ახლაც გამოვიდნენ და დაგმონ ლავროვის მოწოდება“ - ხატია დეკანოიძე

პოლიტიკა - 13:17, 17 Jul, 2019

1291

„ერთიანი ნაციონალური მოძრაობის“ ლიდერი ხატია დეკანოიძე მმართველ გუნდს მოუწოდებს, რომ ისევე დაგმოს რუსეთის საგარეო საქმეთა მინისტრის განცხადება, როგორც ჟურნალისტის მიერ პუტინის შეურაცხყოფა დაგმო. დეკანოიძის შეფასებით, საქართველო ხელისუფლება პროდასავლურ ძალებს, სწორედ რუეთის დავალებით ებრძვის:

„ნებისმიერი ინსტიტუციონალური, პროდასავლური განწყობა და ორგანიზაცია საქართველოში, იქნება ეს „რუსთავი 2,“ პროდასავლური პარტიები, პროტესტი, აქციები ახალგაზრდების, ეს არის საფრთხე რუსეთისთვის, ვინაიდან რეალურად წარმოადგენს საქართველოს ხელისუფლების პროდასავლურ განწყობას. რუსეთისთვის ერთადერთი მისაღები მოცემულობა ეს არის „ქართული ოცნება," "პატრიოტთა ალიანსი“ და ვასაძისნაირი ფაშისტური ჰომოფობიური ძალები. აი, სწორედ ამიტომ უტევს "ქართული ოცნება" რუსეთის დავალებით "რუსთავი 2"-ს და პროდასავლურ პარტიებს. სწორედ ამიტომ არ მოსწონს პროტესტი, რომელიც მიმდინარეობს რუსთაველზე. შესაბამისად, მაშინ როცა კერძო კომპანიის საავტორო გადაცემაში, თუნდაც უხამსი მონოლოგის შემდეგ გამოვარდა, დაეწყო მთელი მთავრობა და დაგმო მონოლოგი და შემდეგ უკვე პუტინს სანქციებთან დაკავშირებულ განცხადებაზე, მას მოუხადეს მადლობა. ახლაც გამოვიდნენ, დაგმონ ლავროვის მოწოდება და რეალურად უწოდონ საჯაროდ მას, როგორც საქართველოს შიდა საქმეებში ჩარევა.“- განაცხადა ხატია დეკანოიძემ.

შეგახსენებთ, სერგეი ლავროვმა რუსულ მედიასთან ინტერვიუში იმედი გამოთქვა, რომ საქართველოს ხელისუფლება შეძლებს საზოგადოებრივ-პოლიტიკური სიტუაციის სტაბილიზირებას ქვეყანაში და რუსების უსაფრთხოებასთან დაკავშირებული საფრთხეების აღმოფხვრას. ლავროვის თქმით, კრემლი საქართველოს ხელმძღვანელობისგან ელოდება იმ ზიანისა და საფრთხის მალე გაცნობიერებას, რომელსაც ანტირუსული ისტერიის გამძაფრება მოიტანს.