"უზბეკეთის ტიპის დიქტატურის დამყარება მიუღებელია საზოგადოებისთვის"- "ოცნების" ფსონი რუსეთზე და ივანიშვილის არჩევანი

პოლიტიკა - 11:47, 17 Jul, 2019

801

GSAC-ის დამფუძნებელი, ნოდარ ხარშილაძე მაიკლ კარპენტერის განცხადებას აფასებს და ამბობს, რომ აშშ-ის ყოფილი ვიცეპრეზიდენტის, ჯო ბაიდენის, მრჩეველმა ღია გზავნილი გაუგზავნა ბიძინა ივანიშვილს, რომ საქართველო არასწორ გზას ადგას.

"კიდევ ერთხელ გვიკეთებენ მინიშნებას, რომ საქართველო არასწორ გზას ადგას. ის რასაც დღეს საქართველოს ხელისუფლება აკეთებს არასწორია. ეს არის ძალიან მეგობრული, მაგრამ ღია საუბარი იმაზე რომ ჩვენ კიდევ ერთხელ ვაკეთებთ ნაბიჯებს არასწორი მიმართულებით. ეს ახალი არჩევანის შესაძლებლობა დააყენა ბიძინა ივანიშვილმა - ან რუსეთი ან დასავლეთი და ამ კითხვაზე მოსახლეობამ ძალიან დიდი ხანია გასცა პასუხი. ამიტომ ამ თემის თავიდან წამოწევა და საქართველოში ბელორუსიის ან უზბეკეთის ტიპის დიქტატურის დამყარება, რომელშიც იგი დარჩება ეს იქნება მიუღებელი. ეს არის გზავნილი ბატონ ივანიშვილს"- განაცხადა ნოდარ ხარშილაძემ.

აშშ-ის ყოფილი ვიცეპრეზიდენტის, ჯო ბაიდენის, მრჩეველმა თავდაცვის საკითხებში მაიკლ კარპენტერმა Al Jazeera-სთან ინტერვიუში საქართველოში ზრდად რუსულ გავლენაზე და ანტირუსულ პროტესტზე ისაუბრა. მისი თქმით, ქართულმა ოცნებამ ფსონი თავიდანვე რუსეთთან ურთიერთობის ნორმალიზებაზე დადო, ახლა კი ქართული საზოგადოება დაფიქრდა, სურს თუ არა, ეკონომიკურად მოწყვლადი იყოს რუსეთის მიმართ.

რუსულ გავლენაზე საუბრისას კარპენტერმა თქვა, რომ ოკუპაციის პარალელურად, ქართულმა საზოგადოებამ სწორედ ეს ნორმალიზების პოლიტიკა გააპროტესტა.