"რუსეთმა "ოცნების" ხელისუფლების დახმარებით, საქართველოში ეფექტური სახელმწიფოს მიტაცება განახორციელა"- ბათუ ქუთელია

პოლიტიკა - 11:28, 17 Jul, 2019

1779

"საქართველოს ატლანტიკური საბჭოს" ვიცე-პრეზიდენტი, ბათუ ქუთელია ამბობს, რომ "ქართული ოცნების" ხელისუფლების განცხადებები პროდასავლურ კურსზე ფასადური იყო.

მისი თქმით, ოკუპანტმა რუსეთმა, "ოცნების" ხელისუფლების დახმარებით, საქართველოში საკმაოდ ეფექტური სახელმწიფოს მიტაცება განახორციელა.

"რუსეთმა საქართველოში განახორციელა საკმაოდ ეფექტური სახელმწიფოს მიტაცება და ეს განახორციელა "ქართული ოცნების" დახმარებით. ის ამას ახორციელებდა მიზანმიმართულად როგორც პოლიტიკურ, ისე ეკონომიკურ სფეროებში რუსული კლეპტოკრატიული ფულის შემოდინებით და ასევე გადაწყვეტილების მიმღებებზე პირდაპირი გავლენით. ყველა ჩვენი პარტნიორი თვალნათლივ ხედავს, რომ ბოლო 7 წლის განმავლობაში საქართველო ეფექტურად მოხვდა რუსული გავლენის ქვეშ და დღეს უკვე რუსეთს საკმაოდ მძლავრი ბერკეტები აქვს საქართველოს ეკონომიკაზე და შიდაპოლიტიკურ ცხოვრებაზე.

ხელისუფლების წარმომადგენლები გაექცათ სადავეები იმ მოცემულობაში, როდესაც ისინი ფასადს ქმნიდნენ, რიტორიკულად ამბობდნენ, რომ იყვნენ პროდასავლური სახელმწიფო, მაგრამ რეალურად აწყობდნენ საქართველოში პუტინის ტიპის სუვერენული დემოკრატიის ანუ ნანონით მართველობით სისტემას და ეს საკმაოდ ეფექტურად განახორციელეს"- ამბობს ქუთელია.
აშშ-ის ყოფილი ვიცეპრეზიდენტის, ჯო ბაიდენის, მრჩეველმა თავდაცვის საკითხებში მაიკლ კარპენტერმა Al Jazeera-სთან ინტერვიუში საქართველოში ზრდად რუსულ გავლენაზე და ანტირუსულ პროტესტზე ისაუბრა. მისი თქმით, ქართულმა ოცნებამ ფსონი თავიდანვე რუსეთთან ურთიერთობის ნორმალიზებაზე დადო, ახლა კი ქართული საზოგადოება დაფიქრდა, სურს თუ არა, ეკონომიკურად მოწყვლადი იყოს რუსეთის მიმართ.
რუსულ გავლენაზე საუბრისას კარპენტერმა თქვა, რომ ოკუპაციის პარალელურად, ქართულმა საზოგადოებამ სწორედ ეს ნორმალიზების პოლიტიკა გააპროტესტა.