"პოლიტიკური ანეკდოტების სიას განეკუთვნება" - პრემიერი IRI-ის კვლევას უნდობლობას უცხადებს

პოლიტიკა - 17:41, 16 Jul, 2019

850

მთავრობის სხდომის დაწყების წინ გამართულ ბრიფინგზე საქართველოს პრემიერ-მინისტრი IRI-ის კვლევების შედეგებს გამოეხმაურა და მას არასერიოზული უწოდა.

„მე გამიჭირდება ამას სერიოზულად ვუპასუხო. ის ისეთი ტიპის ინფორმაციაა, რომელიც უფრო, ალბათ, პოლიტიკური ანეკდოტების სიას განეკუთვნება, ვიდრე სერიოზულ საკითხს. რა თქმა უნდა, ნებისმიერი კვლევა არის მნიშვნელოვანი, ნებისმიერი პოლიტიკური პარტიისთვის. თუმცა, ეტყობა, იქ საველე სამუშაოს ვინც აწარმოებს, ის არ აწარმოებს იმას იმ კრიტერიუმების დაცვით, როგორც ეს უნდა ხდებოდეს,“ - განაცხადა მამუკა ბახტაძემ.

საკითხზე საუბრისას ბახტაძემ თქვა, რომ პროპორციული არჩევნების პირობებში კოალიციური მთავრობის არსებობა გამორიცხული არ არის. ჟურნალისტებმა მთავრობის მეთაურს ჰკთხეს, გაერთიანდება თუ არა "ქართული ოცნება" "პატრიოტთა ალიანსთან", თუმცა მან ამ კითხვას არ უპასუხა.

"რაც შეეხება კოალიციური მთავრობის ალბათობას, ბუნებრივია, როდესაც ჩვენ ვსაუბრობთ პროპორციულ არჩევნებზე ნულოვანი ბარიერის პირობებში, რა თქმა უნდა, ამის ალბათობა არის გაცილებით მაღალი. მაგრამ 2020 წლის ოქტომბრამდე არის საკმაოდ დიდი დრო დარჩენილი. მე ნაადრევად არ გავაკეთებდი ასეთ დასკვნებს, ეს იქნება დამოკიდებული მხოლოდ ქართველი ერის არჩევანზე თვითონ საარჩევნო სისტემა, რომელიც არის დაანონსებული ჩვენი მხრიდან, კოალიციური მთავრობის ალბათობას ნამდვილად ზრდის,"-განაცხადა მამუკა ბახტაძემ.