პროპორციული საარჩევნო სისტემა - ოპოზიციის ლიდერების განცხადებით, საარჩევნო სისტემის ცვლილება არ უნდა გაჭიანურდეს

პოლიტიკა - 13:14, 16 Jul, 2019

615

დღეს პარლამენტის საპროცედურო საკითხთა და წესების კომიტეტმა პროპორციულ საარჩევნო სისტემაზე გადასვლასთან დაკავშირებით ოპოზიციური პარტიების წარმოდგენილი ხელმოწერების ნამდვილობის დადასტურების საკითხი განიხილა. ხელმოწერები მანამდე შეგროვა, ვიდრე ხელისუფლება სისტემის ცვლილებაზე თანხმობას საპროტესტო აქციების შედეგად განაცხადებდა. კომიტეტის შემდეგ, საკითხს ბიუროზე დაარეგისტრირებენ და სავარაუდოდ, საშემოდგომო სესიაზე განიხილავენ.

საპარლამენტო და არასაპარლამენტო ოპოზიციის ლიდერების განცხადებით, საარჩევნო სისტემის ცვლილება არ უნდა გაჭიანურდეს და 2020 წლის არჩევნებისთვის ყველა დეტალი შეთანხმებული უნდა იყოს.

„უმჯობესია ოპერატიულად განხორციელდეს პროცედურები, რათა არჩევნებამდე დაახლოებით ერთი წლით ადრე საზოგადოებამ პოლიტიკურმა პარტიებმა , ყველამ იცოდეს, რომ ახალი მოცემულობა შეიქმნა საარჩევნო სისტემისათვის.“- განაცხადა მამუკა კაციტაძემ.

ბაჩუკი ქარდავას თქმით, ხელისუფლებას არ უნდა მიეცეს არანაირი საბაბი, რომ უკან წაიღოს პროპორციული სისტემასთან დაკავშირებით გადაწყვეტილება, რომელიც ოპოზიციის მიერ ხელმოწერების შეგროვების და ახალგაზრდების მიერ რუსთაველზე გამართული საპროტესტო აქციების შედეგად იქნა მიღწეული:

„300 ათასი ხელმოწერა, რომელიც წარადგინა ოპოზიციამ და იმ ადამიანების პროტესტი, რომელიც გაისმის დედაქალაქის მთავარ გამზირზე, ფაქტობრივად გახდა გადამწყვეტი, რომ ხელისუფლება წავიდა დათმობებზე და იძულებული გახდა გადავიდეს იმ სამართლიან სისტემაზე, როგორიც არის პროპორციული სისტემა. ახლა პროცედურულად რაც შეეხება ჩვენს მიერ ინიცირებულ ვარიანტს და ხელისუფლების ინიცირებულს, დასაწყისშივე მინდა განვაცხადო, რომ ჩვენ ყველნაირად შევუწყობთ ხელს, რომ ხელისუფლებას არ მიეცეს არანაირი საბაბი, რომ უკან წაიღოს ის დაპირება, რომელიც ივანიშვილის მხრიდან იქნა გაჟღერებული, პროპორციულ არჩევნებთან დაკაშირებით.“- განაცხად ბაჩუკი ქარდავამ.