„მაკნატუნაში“ საგადასახადო შემოწმება პოლიტიკური მიზნებისთვის გამოყენების მორიგი მცდელობაა

„მაკნატუნაში“ საგადასახადო შემოწმება პოლიტიკური მიზნებისთვის გამოყენების მორიგი მცდელობაა - შემოსავლების სამსახურის განცხადება

პოლიტიკა - 16:59, 15 Jul, 2019

2934

"ნიუპოსტის" ინფორმაციას, რომ მზესუმზირის მწარმოებელ კომპანია „მაკნატუნა“-ში ფინანსთა სამინისტროს შემოსავლების სამსახურიშევიდა უწყება ოფიციალურად ადასტურებს.

როგორც ჩვენთვის მოწოდებულ განცხადებაშია საუბარი, "„მაკნატუნაში“ მიმდინარე საგადასახადო შემოწმების მიბმა პოლიტიკური პროცესებისათვის არის მოსახლეობისთვის შეგნებულად არასწორი ინფორმაციის მიწოდებისა და ცალკეული ჯგუფების მიერ ამ ინფორმაციის პოლიტიკური მიზნებისთვის გამოყენების მორიგი მცდელობა".

ცნობისთვის, შპს "მაკნატუნას" დირექტორმა, დავით ფხაკაძე ამბპობს, რომ კომპანიაში შემოსავლების სამსახური ეს მას შემდეგ შევიდა, რაც „მაკნატუნამ“ საკუთარი პროდუქციის შეფუთვაზე მომხმარებელს კიდევ ერთხელ შეახსენა, რომ საქართველოს 20% ოკუპირებულია და აღნიშბული პროდუქცია რუსთაველის გამზირზე მიმდინარე აქციაზე მისმა ძმამ დაარიგა.

გარდა ამისა, „მაკნატუნას“ ხელმძღვანელი „ნიუპოსტთან“ ამბობს, რომ მისი ძმა, თორნიკე ცერცვაძე, რომელმაც ანტისაოკუპაციო აქციაზე იმყოფებოდა და მზესუმზირას არიგებდა, სარაგბო კლუბ „ლელოდან“ გამოუშვეს.

"ნიუპოსტი" ფინანსთა სამინისტროს შემოსავლების სამსახურის განცხადებას უცვლელად გთავაზობთ:

"საქართველოს საგადასახადო კანონმდებლობით, გადასახადის გადამხდელის შესახებ ინფორმაცია წარმოადგენს საგადასახადო საიდუმლოებას, თუმცა მაღალი საჯარო ინტერესიდან გამომდინარე და მოსახლეობისთვის ობიექტური ინფორმაციის მიწოდების მიზნით, ფინანსთა სამინისტროს შემოსავლების სამსახური განმარტავს, რომ შპს „მაკნატუნას“ მიმართ, სასაქონლო-მატერიალური ფასეულობების ინვენტარიზაციის საფუძველზე მიმდინარე საგადასახადო შემოწმების პროცესი მიმდინარეობს.

აღსანიშნავია, რომ ფინანსთა სამინისტროს შემოსავლების სამსახურის საგადასახადო მონიტორინგის დეპარტამენტმა შპს „მაკნატუნას“ სასაქონლო-მატერიალური ფასეულობების ინვენტარიზაცია დაიწყო გასული წლის 26 ნოემბერს და ამჟამად კი მიმდინარეობს შპს „მაკნატუნას“ მიერ წარმოდგენილი მასალების დამუშავება და შესწავლა.

აღნიშნული პროცესი სრულ შესაბამისობაშია საგადასახადო კანონმდებლობით გათვალისწინებულ ნორმებთან, კერძოდ, საქართველოს საგადასახადო კოდექსის 261-ე მუხლის მიხედვით საგადასახადო ორგანოს უფროსს უფლება აქვს, სასამართლოს გადაწყვეტილების გარეშე გამოსცეს პირის სასაქონლო-მატერიალური ფასეულობის ან/და ძირითადი საშუალებების ინვენტარიზაციის ჩატარების ბრძანება კალენდარული წლის განმავლობაში არა უმეტეს 2-ჯერ, ხოლო მე-3-ჯერ ინვენტარიზაცია შესაძლებელია ჩატარდეს შემოსავლების სამსახურის უფროსის/მისი მოადგილის ბრძანებით.

აქვე ხაზგასმით აღვნიშნავთ, რომ ფინანსთა სამინისტროს შემოსავლების სამსახურის მონიტორინგის დეპარტამენტის მიერ, საგადასახადო კანონმდებლობის შესაბამისად ყოველდღიურად ხდება ათეულობით კომპანიის შემოწმება და ეს ჩვეულებრივი პროცესია, შესაბამისად, შპს „მაკნატუნაში“ მიმდინარე საგადასახადო შემოწმების მიბმა პოლიტიკური პროცესებისათვის არის მოსახლეობისთვის შეგნებულად არასწორი ინფორმაციის მიწოდებისა და ცალკეული ჯგუფების მიერ ამ ინფორმაციის პოლიტიკური მიზნებისთვის გამოყენების მორიგი მცდელობა"- ნათქვამია განცხადებაში.