"მატყუარა პრემიერი!" მითხარით ერთი პოლიციელი, რომელიც სისხლიანი ღამისთვის დაისაჯა"- უდუმაშვილი ბახტაძის მუქარაზე

პოლიტიკა - 14:10, 15 Jul, 2019

553

"მატყუარა პრემიერი"- ასე უპასუხა "ნაციონალური მოძრაობის" ერთ-ერთმა ლიდერმა ზალიკო უდუმაშვილმა მამუკა ბახტაძის მუქარას, რომელიც მთავრობის მეთაურმა დღეს ოპოზიციის მისამართით გააჟღერა.

როგორც ენმ-ს წევრმა "ნიუპოსტს" განუცხადა, გავრილოვის სისხლიანი ღამიდან თითქმის 1 თვის თავზე მოძალადე სამართალდამცავები დასჯილები არ არიან. უდუმაშვილი ამბობს, რომ სამაგიეროდ სისხლის სამართლებრივი დევნდა დაიწყო ოპოზიციის ლიდერების წინააღმდეგ.

"პრემიერ-მინისტრი ისეთივე მატყუარაა, როგორიც გიორგი გახარია და მთლიანად "ქართული ოცნება". ხელისუფლების წარმომადგენლები ასე უსირცხვილოდ გამოდიან ტელეეთერით და ოპოზიციის პასუხისმგებლობაზე საუბრობენ.

20 ივნისის ტრაგიკული ღამიდან თითქმის ერთი თვე გავიდა. მითხარით, ერთი პოლიციელის სახელი და გვარი, რომელიც პასუხისგებაში მიეცა ან დაისაჯა ამ სისხლიანი მოვლენების გამო. სამაგიეროდ ჩვენ ვხედავთ, რომ ოპოზიციის მასიური დევნა მიმდინარეობს. ნიკა მელიას წინააღმდეგ აღძრულია სისხლის სამართლის საქმე. ყველა ლიდერი, რომელიც პარლამენტთან იმყოფებოდა დაკითხვაზეა დაბარებული. ამის პარალელურად ჩვენ ვხედავთ, რომ არცერთი პოლიციელის გამოკითხვაც კი არ მომხდარა. ეს არის "ქართული ოცნების" სამართალი.

ბახტაძე საერთოდ როგორ ჩნდება ტელეკამერებთან, მას შემდეგ რაც მან 20 ივნისის ღამეს იკადრა?! - დარბევამდე 10 წუთით ადრე გამოვიდა და მოსახლეობას უთხრა, რომ "ქართული ოცნება" არ არის ის ხელისუფლება, რომელიც საკუთარი მოსახლეობის წინააღმდეგ ტყვიებს გამოიყენებდა და ამ განცხადებიდან 10 წუთში დაიწყო მომიტინგეების დარბევა. ასეთი პრემიერი გვყავს ჩვენ, რომელსაც არავინ არაფერს ეკითხება.

მე არც იმის იმედი მაქვს, რომ ამ ხელისუფლების პირობებში გახარია, რომც გადადგეს, ეს გამოძიება ჩატარდება ნორმალურად. თუმცა გარწმუნებთ, მას შემდეგ რაც ეს ხელისუფლება წავა და ეს ძალიან მალე მოხდება, ახალი ხელისუფლება ბოლომდე მიიყვანს ამ გამოძიებას"- თქვა ზალიკო უდუმაშვილმა.