"ერთმა პოლიციელმა ცემისგან ცალ თვალში მხედველობის 95% დაკარგა" - შს მინისტრის მოადგილე 20 ივნისის მოვლენებზე

პოლიტიკა - 12:26, 15 Jul, 2019

986

შინაგან საქმეთა მინისტრის მოადგილემ კახა საბანაძემ, „კვირი პალიტრასთან“ ინტერვიუში 20 ივნისის აქციის დაშლაზე ისაუბრა და განაცხადა, რომ აქტიური საშუალებების გამოყენება საჭირო გახდა იმისათვის, რომ პოლიციელების სიცოცხლე და ჯანმრთელობა შენარჩუნებულიყო და ამავე დროს მომხდარიყო პარლამენტის შენობის დაცვა ძალადობრივი შტურმისგან. საბანაძის თქმით, ერთმა პოლიციელმა ცემისგან ცალ თვალში მხედველობის 95 პროცენტი დაკარგა:

„პოლიცია დაახლოებით 2 საათი, ფაქტობრივად, შიშველი ხელებით, მხოლოდ ფარის ანაბარა იცავდა თავს და პარლამენტს აქტიური შტურმისგან. მაქსიმუმი კეთდებოდა იმისთვის, რომ შესაძლებლობის ფარგლებში აქტიური, კანონით გათვალისწინებული სპეცსაშუალებების გამოყენების გარეშე დაგვეცვა პარლამენტის შენობა, თუმცა 00:00 საათისთვის, შტურმის დაწყებიდან 2 საათის შემდეგ, მას შემდეგ, რაც გაიტაცეს 316 ფარი, პოლიციელებს წაართვეს ჩაფხუტები და ხელკეტები, გაიტაცეს 30 პოლიციელი და გაუსწორდნენ ფიზიკურად, გარდაუვალი გახდა აქციის დაშლა. ერთმა პოლიციელმა ცემისგან ცალ თვალში მხედველობის 95 პროცენტი დაკარგა... როცა 2 საათის განმავლობაში პოლიციელები იბრძვიან და იგერიებენ შემოტევას, ფიზიკურად შეუძლებელი გახდა შეკავება და იმისათვის, რომ პოლიციელების სიცოცხლე და ჯანმრთელობა შეგვენარჩუნებინა და ამავე დროს დაგვეცვა პარლამენტის შენობა ძალადობრივი შტურმისგან, იძულებული ვიყავით დაგვეწყო აქტიური საშუალებების გამოყენება.“- განაცხადა საბანაძემ.