როცა მთავრობა კუდიანებზე ნადირობს, ხელის გაშვერა ძალიან ცუდად გამოიყურება

როცა მთავრობა კუდიანებზე ნადირობს, ხელის გაშვერა ძალიან ცუდად გამოიყურება - გიგი უგულავა ოთო კახიძეს არ ეთანხმება

პოლიტიკა - 15:20, 14 Jul, 2019

3383

"ევროპული საქართველოს" წევრის ოთარ კახიძის განცხადებას პარტიის ერთერთი ლიდერი გიგი უგულავა გამოეხმაურა.

"9 აპრილის დარბევამდე ყველაზე დიდი ოვაცია ეროვნული მოძრაობის ლიდერების დაპატიმრების მოწოდებას მოყვა. "აბა რა, ეგრე რა, მაგის გარეშე როგორ შეიძლება" - ისმის ხმები ფოფხაძის პარალელურად.

9 აპრილის შემდეგაც პირველი ოფიციალური ხაზი იყო ეროვნული მოძრაობისთვის, მათი ლიდერებისთვის, გადაბრალება. ამ მიმართულებით დისკუსიების გადატანა. აქედან დაწყებული ეგ ნაცადი ხერხი გახდა. პროტესტის მოტივისგან დამოუკიდებლად, მუდმივად იყო რუსთაველის პერიპეტიების ოპოზიციაზე გადაბრალების მცდელობები (ზოგჯერ ლეგიტიმური საფუძვლებითაც), მაგრამ არასდროს არაფერი გამოვიდა.

რუსთაველზე დარბევაზე და მის მიზეზებზე საზოგადოებას ყოველთვის ერთი დამნაშავე ყავდა და ეს ხელისუფლება იყო. ახლაც ასე იქნება.

პოლიტიკოსები ყველაფერზე ვკამათობთ, თუმცა სანამ ხალხისთვის 20 ივნისის ტრაგედია ჯერ ძალიან ღია ჭრილობაა, როცა მთავრობა ჯერ კუდიანებზე ნადირობს, კინკლაობა და ხელის გაშვერა ძალიან ცუდად გამოიყურება. ამ დისკუსიის დროც მოვა, მაგრამ არა ახლა," - აცხადებს გიგი უგულავა.

შეგახსენებთ, რომ „ევროპული საქართველოს“ წევრი ოთარ კახიძე სოციალურ ქსელში სოფო ვერძეულის განცხადებას გამოეხმაურა. კერძოდ, თავის პოსტში ოთო კახიძე აღნიშნავს, რომ ნაცმოძრაობის პოლიტსაბჭოს თავმჯდომარეს, ნიკა მელიას არ უნდა გაეკეთებინა პროვოკაციული და სრულიად უპასუხისმგებლო მოწოდება პარლამენტის ეზოში "მშვიდობიანად შესვლის" თაობაზე.