მევენახეების სახელით გვარამიას წინააღდეგ ინფორმაციის გავრცელებას სააგენტოებს საბიუჯეტო ორგანიზაციები სთხოვდნენ

პოლიტიკა - 18:09, 12 Jul, 2019

1364

მევენახეების სახელით გვარამიას წინააღდეგ ინფორმაციის გავრცელებას სააგენტოებს საბიუჯეტო ორგანიზაციები სთხოვდნენ. ამის შესახებ საუბარია იმ განცხადებაში, რომელიც კახეთის საინფორმაციო ცენტრის დამფუძნებელმა, "reg info-ს" ხელმძღვანელმა, გელა მთივლიშვილმა გაავრცელა.

მისი თქმით, ყვარლის მუნიციპალიტეტიდან მერიასთან გაფორმებული ხელშეკრულების ფარგლებში, მას მიაწოდეს ინფორმაცია , რომლის გავრცელებაზეც სააგენტომ უარი განაცხადა. საუბარია ინფორმაციაზე, რომელშიც გლეხებს "რუსთავი 2"-ის გენერალური დირექტორი, ნიკა გვარამია უნდა გაეკრიტიკებინათ.

"დღეს, ერთ-ერთმა საბიუჯეტო ორგანიზაციამ (ყვარლის მუნიციპალიტეტის მერიამ), რომელსაც „რეგინფოსთან“ აქვს ხელშეკრულება საინფორმაციო-სარეკლამომომსახურების გაწევაზე, სააგენტოს, ვებგვერდზე გამოსაქვეყნებლად მოაწოდა შემდეგი შინაარსის ინფორმაცია - „ქართველი მევენახე: 40-ათასხელფასიან ნიკა გვარამიას გლეხები ფეხებზე ჰკიდია.“

"დამკვეთის მიერ მოწოდებულ და ჩვენს ვებგვერდებზე გამოქვეყნებულ ყველა ამბავს აწერია რეკლამა (R), მეტიც, იქვე ვუთითებთ დამკვეთის ვინაობასაც, მაგრამ ამ ნიუსის გამოქვეყნებაზე, ამ ფორმითაც უარი ვთქვით.
ვცდილობთ, სარეკლამო მასალების შინაარსში არ ჩავერიოთ, თუმცა მიგვაჩნია, რომ საბიუჯეტო თანხები ამაზე არ უნდა იხარჯებოდეს!!! სამწუხაროდ, სხვა სააგენტოებმა ეს მასალა (იგივე სათაურით) გაავრცელეს როგორც დღის ახალი ამბავი. დაფინანსებული რომ არის, ესეც კი არ მიუთითეს.

მეორეა, ეს მევენახე მართლა არსებობს თუ გამოგონილია ავტორიც და მისი განცხადებაც. ამას გავარკვევთ,"-წერს მთივლიშვილი.