"მე არ ვყოფილვარ პარლამენტში" - საფრანგეთის ელჩი გახარიას სკანდალურ განცხადებაზე

პოლიტიკა - 12:45, 12 Jul, 2019

1738

საფრანგეთის ელჩი საქართველოში პასკალ მენიე აცხადებს, რომ 20 ივნისის ღამეს ის პარლამენტის შენობაში არ ყოფილა. ფრანგმა დიპლომატმა ამით, შს მინისტრის გიორგი გახარიას განცხადებას უპასუხა იმასთან დაკავშირებით, რომ 20 ივნისის ღამეს განვითარებული მოვლენებისას ის პარლამენტში ელჩებთან ერთად იმყოფებოდა:

„პირადად მე არ ვყოფილვარ, მაგრამ ვიცი, რომ გერმანიის ელჩი, რომელმაც დამირეკა, პარლამენტში იყო, რა დრომდე ეს არ ვიცი. არ მიმიღია სატელეფონო ზარი, ან შეიძლება გამომრჩა, რადგან სადილზე ვიმყოფებოდი მეგობრებთან ერთად იმ საღამოს. ჩემი აზრით, გამოძიება უნდა ჩატარდეს სახალხო დამცველის ჩართულობით. რაც შეეხება მის გადადგომას ან დარჩენას, მისი პირადი პასუხისმგებლობის საქმეა. ჩემი აზრით, პოლიტიკოსებმა უნდა შეაფასონ ახლანდელი სიტუაცია, მაშინდელიც და შემდგომ მიიღონ გადაწყვეტილება, მე მის მაგივრად გადაწყვეტილებას ვერ მივიღებ. დიპლომატები აქ დასახმარებლად იმყოფებიან. ჩვენ გვინდა რომ საქართველო წარმატებული იყოს, ნამდვილად არ გვახარებს იმის ნახვა, როგორაა საზოგადოება დაყოფილი. ჩემი აზრით ყველამ პატივი უნდა სცეს წესებს, ჩვენ ვერ ვიქნებით პასუხიმგებელი მთავრობის მიერ მიღებულ გადაწყვეტილებებზე. თუ აზრს გვკითხავენ, ვეუბნებით, მაგრამ ისინი არიან არჩეული, ეკისრებათ პასუხისმგებლობა და მათი ვალია ხალხის წინაშე იმოქმედონ შეგნებულად.“- განაცხადა პასკალ მენიემ.