„პრემიერმა კონკრეტული პასუხი გასცეს პუტინს“ - ბაქრაძე რუსეთის პრეზიდენტის მიერ ისტორის თავხედურ გაყალბებაზე

პოლიტიკა - 15:44, 10 Jul, 2019

689

"ევროპული საქართველოს" ერთ-ერთი ლიდერი ოკუპანტი ქვეყნის პრეზიდენტის, ვლადიმერ პუტინის განცხადებას და საქართველოს ხელისუფლების დუმილს ეხმაურება.

ბაქრაძე ამბობს, რომ პუტინის მხრიდან საქართველოს ისტორიის დამახინჯება უაღრესად საშიში პოლიტიკური მეთოდია, რომლითაც პუტინი ცდილობს გაამართლოს აფხაზეთის და ცხინვალის რეგიონის ოკუპაცია.

"პუტინის მხრიდან საქართველოს ისტორიის დამახინჯება არ არის მხოლოდ საქართველოს ისტორიასთან, წარსულთან და ეროვნულ ღირსებასთან ბრძოლა, ეს არის უაღრესად საშიში პოლიტიკური მეთოდი და გზავნილი, რომლითაც პუტინი ცდილობს გაამართლოს აფხაზეთის და ცხინვალის რეგიონის ოკუპაცია. პუტინი ცდილობს ისტორიის დამახინჯებით და გაყალბებით საზოგადოება შეცდომაში შეიყვანოს თითქოს ქართველები არიან აგრესორები, თითქოს აფხაზეთი და ცხინვალის რეგიონი არასდროს არ ყოფილა საქართველო და რუსეთი არის მხოლოდ მშვიდობისმყოფელი, რომელმაც დაიცვა მცირე ხალხების უფლებები. ეს არის ტყუილი და ეს არის უაღრესად საშიში და მავნებლური განცხადება, მათ შორის პოლიტიკური განცხადება, რომელიც პირდაპირ ებრძვის საქართველოს ინტერესებს. ამიტომ სრულიად აუცილებელია საქართველოს ხელისუფლების მხრიდან გამოთქმული იყოს მკაფიო და ნათელი პოზიცია, ამ განცხადებასთან დაკავშირებით. ამასთანავე ეს პოზიცია არ უნდა იყოს მხოლოდ ზოგადი და ლამაზი ევროპულ-ისტორიული სიტყვებით, როგორც ეს გააკეთა საქართველოს პრემიერ-მინისტმა. დიას, საქართველოს ისტორია არის ევროპის ისტორიის ნაწილი, მაგრამ ჩვენ არ ვედავებით პუტინს ისტორიულ დავაში, დღეს პუტინი იყენებს ისტორიას გენოციდის, ეთნიკური წმენდის და ოკუპაციის გასამართლებლად. ამიტომ ჩვენი პასუხი უნდა იყოს პირველ რიგში პოლიტიკური, რომ რუსეთი არის ოკუპანტი. რუსეთი არის აგრესორი და ვერანაირი ისტორიის გაყალბება რუსეთს ვერ უშველის საკუთარი აგრესიის და ოკუპაციის გასამართლებლად. ეს უნდა იყოს საქართველოს ხელისუფლების პასუხი და ამიტომ მოვუწოდებ საგარეო საქმეთა მინისტრსაც და პრემიერ-მინისტსაც ზოგადი და არაფრისმთქმელი ისტორიული წიაღსვლების ნაცვლად კონკრეტული პასუხი გასცენ პრეზიდენტს პუტინის პრეტენზიას, რომელიც უაღრესად საშიშ ხასიათს ატარებს, ვინაიდან ის ისტორიის გაყალბებით ცდილობს აწმყოს გამართლებას და ჩვენი მომავლის დანგრევას და ამის საშუალება მას უპასუხოდ არ უნდა მივცეთ," - ამბობს ბაქრაძე.