„რუსთავი 2“-ის ჟურნალისტის, გიორგი გაბუნიას მიერ რუსეთს პრეზიდენტის მისამართით გაკეთებულ არაკორექტულ განცხადებას „ოცნების“ კიდევ ერთი წევრი, დეპუტატი ნუკრი ქანთარია „მტრულ მიმართვად“ აფასებს და ამბობს, რომ გამოძიების საგანი უნდა გახდეს, ეს ინდივიდუალური გამოხტომა იყო თუ ორგანიზებული ჯგუფის პროვოკაცია.

“გაბუნიას სახელმწიფოებრივი გადატრიალების რა მოგახსენოთ, მაგრამ მის მიერ გაკეთებული განცხადება აბსოლუტურად მავნებლური, ქვეყნისათვის საზიანო და მტრული იყო. ამ შვიდი წლის განმავლობაში, როგორც იქნა, რუსეთთან სიტუაცია დავაცხრეთ, ტემპერატურა დავწიეთ. ჩვენ შევძელით, რომ ამ დროის განმავლობაში სტაბილური მდგომარეობა ჩამოყალიბებულიყო, რაც გარკვეულ ძალებს არ აწყობთ“, - განუცხადა ნუკრი ქანთარიამ „2020news“-ს.