"ხელისუფლების სათავეში ზის ხალხი, ვისაც ელემენტარული წარმოდგენაც არა აქვს რას ნიშნავს სახელმწიფოებრიობა და ერთი კაცის ბაღჩა-ბოსტანი ჰგონია"

"ხელისუფლების სათავეში ზის ხალხი, ვისაც ელემენტარული წარმოდგენაც არა აქვს რას ნიშნავს სახელმწიფოებრიობა და ერთი კაცის ბაღჩა-ბოსტანი ჰგონია" - დავით ზურაბიშვილი

პოლიტიკა - 11:33, 08 Jul, 2019

976

„რუსთავი 2“-ის ეთერში გიორგი გაბუნიას საავტორო გადაცემა P.S-ში წამყვანის მიერ რუსეთის პრეზიდენტის მიმართ გაკეთებულ შეურაცხმყოფელ განცხადებას და ამაზე საქართველოს ხელისუფლების რეაქციას „რესპუბლიკური პარტიის“ერთ-ერთი ლიდერი დავით ზურაბიშვილი ეხმაურება. ზურაბიშვილის თქმით, ხელისუფლების რეაქციამ აჩვენა რომ ქვეყნის სათავეში ზის ხალხი, ვისაც ელემენტარული წარმოდგენაც არა აქვს რას ნიშნავს სახელმწიფოებრიობა:

„გაგეცინებათ და ამ ხელისუფლებაში იმ ლეგენდარული მოშეს იმედი მაქვს ერთადერთი. ბოლო-ბოლო ისრაელის მოქალაქეა, იცის რა არის სახელმწიფო და სულ მთლად ანტისახელმწიფოებრივ სლეობას არ ურჩევს ამათ, თორემ ესენი რომ ყველანაირი ფსკერის გამბურღავები არიან და მარტო თავის თავზე რომ იყვნენ დამოკიდებულები, ცხრა უღელი ხარ-კამეჩიც ვერ დააკავებდა, ეჭვი არ მეპარება.

ამაზე უარესი რა შეიძლება ქნანო, ვინც იკითხავს, სრული პასუხისმგებლობით მინდა ვუთხრა, რომ დიახ, ამაზე უარესიც შეიძლება ქნან და კიდევ იმ უარესზე უარესიც! როცა ხელისუფლების სათავეში ზის ხალხი, ვისაც ელემენტარული წარმოდგენაც არა აქვს რას ნიშნავს სახელმწიფოებრიობა და ერთი კაცის ბაღჩა-ბოსტანი ჰგონია ეს ქვეყანა (იმ ერთი კაცის ჩათვლით), იქ ყველაფერი შესაძლებელია, ყველაზე კოშმარულ მოლანდებაშიც რომ ვერ წარმოიდგენთ, ისეთი რამეც კი.“- წერს დავით ზურაბიშვილი.