„თბილისი პრაიდის“ კონტრაქციის მონაწილეები პარლამენტის წინ იმყოფებიან და ამჯერად უკვე ანტისაოკუპაციო აქციას აპროტესტებენ. კონტრაქციის მონაწილეები პარლამენტის წინ შეკრებილ მომიტინგეებს, რომლებიც რუსეთის ოკუპაციას აპროტესტებენ, უკვე ორ კვირაზე მეტია, პროვოკატორებად მოიხსენიებენ.

„თბილისი პრაიდის“ მოწინააღმდეგეები შინაგან საქმეთა სამინისტროს მიმართავენ და პარლამენტის წინ განთავსებული საპროტესტო ბანერების აღებისკენ მოუწოდებენ. მათი თქმით, თბილისი ყველა მოქალაქის ქალაქია და ისინი რამდენიმე დღეა, რუსთაველზე თავისუფლად ვერ გადაადგილდებიან.

სასულიერო პირები პარლამენტის წინ მიმდინარე აქციების მოწყობაში ოპოზიციას, კონკრეტულად „ნაციონალურ მოძრაობას“ და „ევროპულ საქართველოს“ ადანაშაულებენ. მათივე თქმით, ლგბტ თემის მიერ დაანონსებული პრაიდი და გავრილოვის შემოსვლის გამო დაწყებული აქციები ოპოზიციის წამოწყებულია და მათ ხელს ამერიკის საელჩოც უწყობს.

რესპუბლიკის მოედნიდან პარლამენტის შენობამდე მსვლელობას სასულიერო პირები წაუძღვნენ. მათი თქმით, პარლამენტთან მშვიდობის პარაკლისი უნდა გადაიხადონ.