20 ივნისის აქციის დაკავებული მონაწილეების პროცესი საქალაქო სასამართლოში გვიან ღამემდე გაგრძელდა. 4 ბრალდებულს, ცოტნე სოსელიას, ბესიკ თამლიანს, კახაბერ კუპრეიშვილსა და ზურაბ ბუდაღაშვილს სასამართლომ აღკვეთის ღონისძიების სახით პატიმრობა შეუფარდა. მათ გამოძიება ჯგუფურ ძალადობაში მონაწილეობას ედავება. ბრალს არც ერთი მათგანი აღიარებს.

"მე როდესაც დფავინახავ, რომ ჩემი ქვეყნის მოქალაქეს, პოლიციელი იქნება თუ ვიღაც სხვა, უკანონოდ თვალს ამოთხრის, აუცილებლად იგივენაირად ვიმოქმედებ," - აცხადებს ერთერთი დაკავებული.

„შესვლა არავის არ უნდოდა, გამორიცხულია. პროტესტი იყო, ხალხის პროტესტი. 20 ივნისის თქვენ დაამსგავსეთ არა 7 ნოემბერს, არა 26 მაისს, არამედ 9 აპრილს. როცა რუსი ხალხს ჩეხავდა ნაჯახებით და დღეს რუსმა იგივე მოედანზე გააკეთა ქართველების ხელით. რატომ იმიტომ რომ რუსი უნდა შემოსულიყო პარლამენტში,“ - განაცხადა ერთ-ერთმა ბრალდებულმა.

მოსამართლის გადაწყვეტილებას კი ხმაურითა და პროტესტით შეხვდნენ დაკავებულების ოჯახის წევრები და ნათესავები. მათ თქმით, მოსამართლემ საპროტესტო აქციის მონაწილეები გამოგონილი ბრალდებისა და ყოველგვარი საფუძველის გარეშე დატოვა საპატიმროში.