"ერთიანი ნაციონალური მოძრაობის“ წევრი გია ბარამიძე, რომელიც "გავრილოვის სისხლიანის ღამის" საქმეზე გამოკითხვაზეა დაბარებული კითხვებზე პასუხების გაცემას მხოლოდ, მაგისტრატი მოსამართლის თანდასწრებით უპასუხებს.

„დღეს გამოძიება უსუსურად ცდილობს, რომ ხელისუფლების პასუხისმგებლობა, პირადად ივანიშვილის, შსს მინისტრისა და ანზორ ჩუბინიძის სისხლის სამართლის დანაშაული რაღაცნაირად აიცილონ და შეეცადონ, ეს ყველაფერი გადაიტანონ ოპოზიციის ლიდერებზე. არა აქვს მნიშვნელობა პირადად ჩემს წინააღმდეგ დაიწყება თუ არა სამართალწარმოება, ფაქტია, რომ ნიკა მელიასთან მიმართებაში დაიწყეს. ეს არის უსუსური მცდელობა, საკუთარი პასუხისმგებლობა დააკისრონ, ოპოზიციის ლიდერებს და ამავდროულად ახდენენ პროპაგანდას თავიანთ მომხრეებში, რომ ხავსს მოეჭიდონ. აი, სახელმწიფო გადატრიალება ხორციელდებოდაო და ამ მუხლით არანაირი საქმე არ არის აღძრული, ისიც აბსურდია, რასაც ნიკა მელიას ედავებიან. ხდება უზნეობის ტირაჟირება, რომ ეს ვარდების რევოლუცია უნდა ყოფილიყო და ვარდების რევოლუცია შეადარეს პრეზიდენტ გამსახურდიას ტანკებითა და ავტომატებით დამხობის პროცესს. სრული ქაოსი აქვთ თავში. ამ ვითარებაში ჩვენი მოვალეობაა, მშვიდად მივყვეთ პროცესს და ხალხს გავაგებინოთ სიმართლე" - აღნიშნა ბარამიძემ.