"სახეზე გვაქვს გამოძიების ფუნდამენტური გაყალბების მცდელობა" - გიგი უგულავა მაგისტრ მოსამართლესთან გამოკითხვაზე მისვლას მივლინების გამო 8 ივლისამდე ვერ ახერხებს

პოლიტიკა - 14:23, 04 Jul, 2019

843

20 ივნისის ღამესთან დაკავშირებით, ნიკა მელიას შემდეგ საგამოძიებო ორგანოში ოპოზიციის სხვა ლიდერებსაც იბარებენ, მათ შორისაა „ევროპული საქართველოს“ ერთ-ერთი ლიდერი გიგი უგულავაც. უგულავა მხოლოდ მაგისტრ მოსამართლესთან გამოკითხვაზეა თანახმა, თუმცა აცხადებს, რომ მას გამოკითხვაზე მისვლა 8 ივლისიდან, ორშაბათიდან შეეძლება, რადგან მანამდე კოლეგებთან ერთად მივლინებით გერმანიაში მიემგზავრება.

"განსაკუთრებით იმ ფონზე, როცა ჩვენი ხელისუფლების მხრიდან ვისმენთ, რომ თურმე დაშლა საერთოდ არ ყოფილა და მოგერიება იყო; თურმე სპეცრაზმელები მოქმედებდნენ თვითდინებით, გადაწყვეტილებას თვითონ იღებდნენ და არანაირი ბრძანება არ ჰქონიათ; სახეზე გვაქვს გამოძიების ფუნდამენტური გაყალბების მცდელობა და რეალობის დამახინჯება - განსაკუთრებით მნიშვნელოვნად მიმაჩნია, რომ სამართლებრივად გამაგრდეს სიმართლე და ძალიან კარგია, რომ მაგისტრ მოსამართლესთან მოხდება ჩვენი დაკითხვა. რადგან ახლანდელი გამოძიების იმედი არ მაქვს, იმისთვის, რომ საზოგადოებამ ახლა თუ არა, მერე მაინც გაიგოს, მე ვაპირებ მაგისტრ მოსამართლესთან მოვყვე ყველა ის დეტალი, რომელიც ამხელს ხელისუფლებას."- განაცხადა გიგი უგულავამ.